Iran ereýilderdi baqylaý úshin FindFace betti taný júıesin paıdalanady
ASTANA. KAZINFORM — Iran narazylyq sharalaryn baqylaý úshin FindFace bet-álpetti taný júıesin paıdalanady, dep habarlaıdy DW.
Júıe beınebaqylaý kameralarynan alynǵan derekterdi naqty ýaqyt rejıminde óńdeıdi jáne ony ártúrli derekqorlarmen, sonyń ishinde polıtsııanyń deregimen salystyrady. Der Spiegel jýrnalynyń birneshe halyqaralyq BAQ-pen birlesip daıyndaǵan zertteýine sáıkes, baǵdarlama adamnyń jasy, jynysy jáne onyń ımıdjimen birge erekshe belgileri týraly aqparatty kórsetedi. Sonymen qatar bul qyzmet «emotsııa súzgisi» dep atalatyn beınelerdi bet-álpetine qaraı suryptaıdy.
Tergeý málimetinshe, «FindFace» baǵdarlamasyn Iranǵa reseılik NtechLab kompanııasy jetkizýi múmkin. Der Spiegel jýrnalynyń habarlaýynsha, kelisimshart 2019 jyly jasalǵan. Uqsas tehnologııa Reseıde 2018 jylǵy fýtboldan álem chempıonatynda qoldanylǵan.
NtechLab baqylaý júıelerin paıdalaný arqyly adam quqyqtaryn buzýǵa qatysy bar degen aıyptaýlarǵa baılanysty Eýropalyq Odaq tarapynan sanktsııalarǵa ushyrady.
Jobaǵa jaqyn derekkóz júıeniń áleýmettik jelilerden derekterdi iriktep jınaýǵa, mátindik habarlamalardy, telefon qońyraýlaryn jáne elektrondyq hattardy taldaýǵa, adamdar arasyndaǵy baılanystardy vızýalızatsııalaýǵa, kontaktilerdiń búkil jelilerin ashýǵa qabiletti ekenin aıtty.
Tergeýde atap ótilgendeı, sońǵy narazylyqtardan keıin Iran bıligi ereýilshilerge qorqytatyn habarlamalar jiberýmen qosa, baqylaý sharalaryn kúsheıtti. Eldiń áskerı jáne barlaý organdary baǵdarlamalyq jasaqtamaǵa qol jetkize alady. Aımaqtaǵy shıelenisterdiń jalǵasyp jatqanyn eskersek, júıeni budan da belsendirek paıdalanýǵa bolar edi.
Eske salaıyq, byltyr jeltoqsan aıynyń sońynda Irannyń astanasy men basqa da iri qalalarynda eldiń qıyn ekonomıkalyq jaǵdaıyna baılanysty jappaı narazylyq sharalary údeı tústi.
