Iran Bahreındegi AQSh radıolokatsııalyq stantsııasyn joıǵanyn málimdedi
ASTANA. KAZINFORM — AQSh pen Iran arasyndaǵy qaqtyǵysty retteý jóninde dıplomatııalyq kelissózder júrip jatqanyna qaramastan, Parsy shyǵanaǵy men Ormýz buǵazyndaǵy jaǵdaı áli de shıelenisip tur, dep habarlaıdy Kazinform agenttiginiń menshikti tilshisi.
Iran Islam revolıýtsııasynyń saqshylar korpýsy 13 qarashada Bahreın aýmaǵyndaǵy AQSh-tyń aldyn ala eskertý radıolokatsııalyq stantsııasyn joıǵanyn málimdedi. Bul týraly vedomstvonyń málimdemesine silteme jasaǵan Irannyń IRNA agenttigi habarlady.
Korpýstyń Áýe-ǵarysh kúshteri bul soqqyny Irannyń ońtústigindegi Hormozgan provıntsııasynyń Sırık aýdanynda ornalasqan telekommýnıkatsııalyq munaraǵa jasalǵan shabýylǵa jaýap retinde jasaǵan.
— Bul — qarsy tarapqa áýe keńistigindegi arandatýshylyq áreketteri men Ormýz buǵazy arqyly munaıdy zańsyz tasymaldaýdy toqtatý týraly qatań eskertý. Eger mundaı áreketter men agressııa qaıtalansa, IRSK Áýe-ǵarysh kúshteri kez kelgen jerde qarymta soqqy jasaýǵa daıyn, — delingen málimdemede.
Sondaı-aq Iran tarapy Tegeran belgilegen keme qatynasy erejelerin buzǵan kompanııalarǵa qosymsha sharalar qoldanylýy múmkin ekenin eskertti.
Reuters agenttiginiń habarlaýynsha, IRSK Parsy shyǵanaǵy elderindegi AQSh áskerı nysandaryna shabýyl jasaǵany týraly qyrkúıek aıynyń basynan beri alǵash ret málimdedi.
Al AQSh pen Bahreın ázirge soqqy jasalǵany týraly aqparatty rastaǵan joq.
Budan bólek juma kúni IRSK áskerı-teńiz kúshteri Ormýz buǵazynda gaz tasymaldaıtyn tanker jarylǵanyn da habarlady. Iran tarapynyń málimetinshe, keme ruqsat etilmegen ári qaýipti baǵytpen júzip bara jatqanda teńiz mınasyna tap bolǵan.
Osyǵan baılanysty tankerdiń ataýy men zardap shekkender týraly málimet ázirge jarııalanǵan joq. Al AQSh, Izraıl jáne Iran arasyndaǵy qarýly qaqtyǵys 28 aqpannan beri jalǵasyp keledi.
Dıplomatııalyq jolmen shıelenisti báseńdetý jónindegi áreketterge qaramastan, Vashıngton Iran porttaryna teńiz blokadasyn jalǵastyryp otyr. Sondaı-aq Ormýz buǵazy arqyly keme qatynasyna da áli shekteý qoıylǵan.
Buǵan deıin Tegeran men Býenos-Aıres arasyndaǵy qarym-qatynas terrorızmdi qoldaýǵa qatysty ózara aıyptaýlar aıasynda shıelenise túskenin habarlaǵan bolatyn.
