Iran Ázerbaıjanǵa jasalǵan soqqyǵa qatysy joq ekenin málimdedi
ASTANA. KAZINFORM — Iran Syrtqy ister mınıstriniń orynbasary Kazem Garıbabadı Ázerbaıjannyń Nahchyvan halyqaralyq áýejaıy mańynda bolǵan drondarmen baılanysty oqıǵaǵa Tegerannyń qatysy bar degen aqparatty joqqa shyǵardy. Bul týraly Kazinform agenttiginiń Bakýdegi menshikti tilshisi habarlady.
— Iran kórshiles elderge soqqy jasamaıdy. Bul oqıǵa muqııat tergeýdi qajet etedi, — dedi dıplomat AnewZ telearnasyna bergen suhbatynda.
Iran’s Deputy Foreign Minister Kazem Gharibabadi has responded to reports that drones struck Nakhchivan International Airport in Azerbaijan, saying Tehran does not target neighbouring countries and that the incident must be investigated.
— AnewZ (@Anewz_tv) March 5, 2026
Gharibabadi who was speaking to AnewZ… pic.twitter.com/zkL9OVOPfB
Ol Islam Respýblıkasynyń qorǵanys strategııasy tańdamaly sıpatqa ıe ekenin atap ótti. Onyń aıtýynsha, Iran tek óz qarsylastarynyń áskerı bazalaryn ornalastyrýǵa aýmaǵyn paıdalanýǵa múmkindik beretin memleketterdi ǵana nysanaǵa alýy múmkin.
Sonymen qatar, Iran Qarýly kúshteri Bas shtaby da arnaıy málimdeme jasap, Ázerbaıjan baǵytynda drondardyń ushyrylǵany týraly aqparatty joqqa shyǵardy.
Alaıda Ázerbaıjannyń Qorǵanys mınıstrligi Irannyń bul shabýylǵa qatysy bar ekenin málimdedi.
— Irannyń búgin Ázerbaıjanǵa qarsy jasalǵan dron shabýylyn joqqa shyǵarýy qabyldanbaıdy. Biz Iran Islam Respýblıkasynyń Qarýly kúshteri bul óreskel málimdemelerin toqtatyp, bolǵan oqıǵa úshin keshirim surap, kinálilerdi tıisti jaýapkershilikke tartady dep kútemiz. Iran Qarýly kúshterine tıesili tórt ushqyshsyz ushý apparaty Nahchyvan óńirine shabýyl jasaý maqsatynda baǵyttalǵan. Onyń birin Ázerbaıjan áskeri joıdy, al qalǵandary azamattyq ınfraqurylymdy, sonyń ishinde sabaq ótip jatqan kezde orta mektep ǵımaratyn nysanaǵa alǵan. Baqytymyzǵa qaraı, mektepke baǵyttalǵan dron maqsatyna jetpeı, ǵımarattyń janynda qulap, jaryldy, — delingen vedomstvo málimdemesinde.
Nahchyvandaǵy oqıǵadan keıin Ázerbaıjan prezıdenti Ilham Álıev shuǵyl túrde eldiń Qaýipsizdik keńesin shaqyrdy.
— Ázerbaıjanǵa qarsy jasalǵan bul negizsiz terror men agressııa aktisine tózbeımiz, — dedi memleket basshysy.
Ilham Álıevtiń aıtýynsha, bolǵan jaǵdaıǵa baılanysty eldiń Qarýly kúshterine jaýap sharalaryn ázirlep, iske asyrý tapsyrylǵan. Ol Ázerbaıjan óz qaýipsizdigi men aýmaqtyq tutastyǵyn qorǵaý úshin barlyq qajetti qadamdardy jasaıtynyn atap ótti.
Buǵan deıin Ázerbaıjan BAQ-tary eldiń eksklav aımaǵynyń aýmaǵyna Iran jaǵynan kelgen bolýy múmkin ushqyshsyz ushý apparattary qulaǵanyn habarlaǵan edi. Oqıǵa saldarynan ınfraqurylymǵa zaqym kelip, zardap shekkender tirkelgen.
