Iran aımaqtaǵy elderge jańa shabýyldar jasalýy múmkin ekenin eskertti
ASTANA. KAZINFORM — Iran AQSh-tyń Islam Respýblıkasyna qarsy áskerı operatsııanyń jalǵasýy aıasynda Taıaý Shyǵystaǵy birqatar elge eskertý jasady, dep habarlaıdy Kazinform agenttiginiń menshikti tilshisi.
Iran SІM resmı ókili Ismaıl Bagaı Parsy shyǵanaǵynyń birneshe eli men Iordanııany CENTCOM qolbasshysy Bred Kýperdiń olardyń AQSh-tyń Iranǵa qarsy shabýyldaryna qatysqany týraly málimdemesin resmı túrde joqqa shyǵarýǵa úndedi.
Bul týraly X áleýmettik jelisinde onyń arab tilindegi jazbasynda habarlandy.
Dıplomattyń aıtýynsha, bul memleketter óz aýmaqtaryn shabýyldarǵa qoljetimdi etse, Iran onda ornalasqan amerıkalyq áskerı bazalar men nysandardy jaýap shabýyldarynyń zańdy nysanalary dep esepteıdi.
— AQSh málimdemesi jalǵan bolsa, bul elder ony resmı jáne ashyq túrde joqqa shyǵarýy kerek, — dep málimdedi Bagaı.
Onyń aıtýynsha, AQSh ÁK Ortalyq qolbasshylyǵynyń (CENTCOM) qolbasshysy Bred Kýper buǵan deıin Parsy shyǵanaǵy yntymaqtastyq keńesine múshe birqatar el men Iordanııa Iranǵa qarsy áskerı shabýyldarǵa qatysqanyn málimdegen.
Bagaı sonymen qatar Tegerannyń pikirinshe, AQSh áskerı operatsııalaryn jeńildetý úshin aýmaqty berý mundaı elderdi qaqtyǵysqa qatysýǵa májbúr etetinin málimdedi. AQSh, Parsy shyǵanaǵy elderi jáne Iordanııa ázirge bul málimdemege qatysty túsinik bergen joq.
Osy arada AQSh Qarýly kúshteri Iran aýmaǵyna soqqy jasaýdy 13-tún qatarynan jalǵastyryp jatyr. Bul týraly AQSh Qarýly kúshteriniń Ortalyq qolbasshylyǵy (CENTCOM) málimdedi.
CENTCOM habarlaýynsha, shabýyldyń negizgi nysanalary basqarý beketteri, ushqyshsyz ushý apparattary saqtalǵan oryndar, jaǵalaýdaǵy baqylaý beketteri, sondaı-aq Irannyń áskerı-teńiz kúshterine tıesili nysandar men áskerı quraldar bolǵan.
CENTCOM sonymen qatar Ormýz buǵazy arqyly keme qatynasy amerıkalyq kúshterdiń qoldaýymen jalǵasyp jatqanyn málimdedi.
Irandyq BAQ habarlaýynsha, AQSh-tyń Ahvaz qalasy mańyndaǵy zymyran shabýylynan tórt adam qaza taýyp, bes adam jaralanǵan. Budan basqa, Horramabad pen Bandar-Abbasqa jasalǵan bólek shabýyldarda eki adam zardap shekti.
Iran áskeri óz kezeginde Bahreın men Iordanııadaǵy amerıkalyq áskerı nysandarǵa drondarmen soqqylar jasaǵanyn jarııalady. Málimdemede nysanalardyń ishinde Bahreındegi «Sheıh Isa» áýe bazasyndaǵy janarmaı qoımalary, jabdyq qoımalary, angarlar men kazarmalar, sondaı-aq Iordanııadaǵy «Mýaffak as-Saltı» (Ál-Azraý) áýe bazasyndaǵy angarlar, jóndeý nysandary jáne turǵyn úıler bolǵany aıtylǵan.
Buǵan deıin Bahreın bıligi áýe dabyly iske qosylǵanyn habarlap, turǵyndardy qaýipsiz jerge barýǵa úndedi.
Iordanııada shabýyldardyń saldary týraly eshqandaı habarlama túsken joq.
Osyǵan deıin AQSh Irandaǵy basqarý beketteri men áskerı nysandardy nysanaǵa alǵanyn jazdyq.
Brent markaly munaıdyń baǵasy mamyr aıynan beri alǵash ret barreline 100 dollardan asty. Buǵan Iran qoldaıtyn Iemendegi hýsıt qozǵalysynyń 23 shildede Qyzyl teńizde Saýd Arabııasynyń eki munaı tankerine soqqy jasaǵanyn málimdeýi sebep boldy.
