Iran Aýǵanstannan áskerılerdiń shyǵarylýyna oń kózqaras ustanady - Hýshang Ámirahmadı
ASTANA. 25 sáýir. QazAqparat - Iran Aýǵanstannan áskerılerdiń shyǵarylýyna oń kózqaras ustanady. Búgin Astanada ótip jatqan Eýrazııa medıa forýmy barysynda sóz sóılegen Iran Islam Respýblıkasynyń prezıdenttigine kandıdat Hýshang Ámirahmadı osylaı málimdedi.
H. Ámirahmadıdiń paıymynsha, Aýǵanstanǵa basqynshylyq bolyp, onyń uzaqqa sozylýy, qıyndyqqa urynýy - bunyń barlyǵy jalpy óńirdegi oqıǵalardyń damýyna jaǵymsyz áser etti.
«Degenmen, shetten kelgen áskerılerdiń shyǵatyn ýaqyty jetti jáne men qazir Aýǵanstan ózin de, óńirdi de ózi qorǵaýǵa, eldegi turaqty jaǵdaıdy ustap turýǵa tıisti jaǵdaıǵa keldi dep esepteımin. Sońǵy jyldary «Talıban» qozǵalysynyń kúsheıip ketkeni belgili, bunyń sebebin de basqynshylyqtan kórýge bolady. Sonyń saldarynan dinı kúshter ulttyq kúshterge aınalyp, olardyń ózderi Otanyn qorǵaıtyndyqtaryn da málimdegen bolatyn. Al NATO qalaı áskerin áketedi, sol sátten bul sıpat ta joǵalady, aýǵan eli óz Otanyn ózderi qorǵaı alatyn dárejege jetedi», - dedi ol.
