Iran áýejaılarynyń jumysy qaıta jandandy

ASTANA.KAZINFORM — Taıaý Shyǵystaǵy jaǵdaıdyń shıelenisýine baılanysty Iran áýejaılary jumysyn ýaqytsha toqtatqan bolatyn. Alaıda búgin áýejaı jumysy qaıta jandanyp, reıster usha bastady.  Bul týraly Irannyń Azamattyq avıatsııa uıymynyń ókili Djafar ıAzarlý málimdedi, dep habarlaıdy Kazinform agenttiginiń menshikti tilshisi. 

Seısenbi kúni Izraılge jasalǵan zymyran shabýylynan keıin Iran áýejaıy jumysyn ýaqytsha toqtatqan edi.

— Qolaıly jáne qaýipsiz ushý jaǵdaılaryn qamtamasyz etkennen keıin jáne shekteýlerdi alyp tastaǵannan keıin avıakompanııalarǵa reısterdi oryndaýǵa ruqsat etildi, — dedi Djafar ıAzarlý beısenbide.

Ol jolaýshylarǵa áýejaıǵa barar aldynda áýe kompanııalarynyń ushý kestelerin tekserýge jáne saıahat josparlaryn rastaýǵa keńes berdi, dep habarlaıdy IRNA.

ıAzarlý sonymen qatar avıakompanııalar zardap shekken jolaýshylarǵa toqtatylǵan reıs bıletteriniń qunyn tolyǵymen qaıtaratynyn atap ótti.

Buǵan deıin Iran bıligi respýblıkanyń áýe keńistigi beısenbi kúni tańerteńge deıin jabylatynyn habarlaǵan.

Eýropalyq avıatsııalyq qaýipsizdik agenttigi óz kezeginde eýropalyq áýe kompanııalaryna kem degende 31 qazanǵa deıin Irannyń áýe keńistigine ushýdan bas tartýdy usyndy.

Izraıldiń jaqyn arada Iranǵa qarsy kek qaıtaramyz degen qoqan-loqqylaryna qaramastan Iran áýejaılaryndaǵy operatsııalar qaıta jandandy.

Irannyń Izraılge jasaǵan zymyran shabýyldarynan keıin halyqaralyq áýe kompanııalary reıster baǵytyn ózgertkenin buǵan deıin habarlaǵan edik.

Qazaqstandyq áýe kompanııalary da Irannyń áýe keńistiginen aınalyp ushatyn bolady. Qazaqstan Respýblıkasy Kólik mınıstrliginiń Azamattyq avıatsııa komıteti Taıaý Shyǵystaǵy jaǵdaıdyń nasharlaýyna baılanysty otandyq áýe kompanııalaryna Irannyń ústinen ushpaýdy usyndy. «Eır Astana» áýe kompanııasy Irandy aınalyp ótip, BAÁ-ge ushatyn bolady.