Iran áýe keńistiginiń jabylýyna baılanysty ushaqtar Tashkent áýejaıyna qonyp jatyr
TAShKENT. KAZINFORM – Iran áýe keńistiginiń ýaqytsha jabylýyna baılanysty halyqaralyq reıs oryndaǵan birneshe ushaq Ózbekstan astanasyndaǵy qosalqy áýejaılarǵa qondy, dep habarlaıdy Kazinform agenttiginiń menshikti tilshisi.
Resmı málimetke sáıkes, búgin «Tashkent-Djıdda» baǵyty boıynsha reıs oryndaǵan Uzbekistan Airways áýekompanııasynyń ushaǵy Tashkentke qondy.
Sonymen qatar Tashkentten Dýbaıǵa baǵyt alǵan Fly Dubai áýekompanııasynyń ushaǵy Ózbekstan astanasyna aıaldady. Jolaýshylar áýejaı termınalyna ýaqytsha ornalastyryldy.
Sondaı-aq «Almaty-Sharm-el Sheıh», «Seýl-Doha» baǵytynda jolaýshylar tasymaldaıtyn Air Cairo jáne Qatar Airways kompanııalaryna tıesili ushaqtar da Tashkent áýejaıyna qondy. Al «Tashkent – Doha» reısiniń ýaqyty keıinge shegerildi.
Eske salaıyq, 13 maýsymǵa qaraǵan túni Izraıldiń áskerı-áýe kúshteri Iranǵa soqqy jasady. Keıin resmı Ierýsalım tótenshe jaǵdaı rejımin jarııalap, óziniń áýe keńistigin japty.
Soqqyǵa jaýap retinde Iran Izraılge 100-den astam dron jiberdi.
