Iran armııasy Tel-Avıvtegi aýdannan evakýatsııa júrgizýdi talap etti
ASTANA. KAZINFORM — Izraıl Tegerandaǵy bir aýdannan evakýatsııa týraly eskertý jasaǵannan keıin, Iran armııasy da Tel-Avıvtegi Neve-Tsedek aýdanyn evakýatsııalaý týraly eskertý jasady, dep habarlaıdy Anadoly.
Iran armııasynyń málimdemesinde Tel-Avıv qalasyndaǵy «sıonıstik qonys» sanalatyn Neve-Tsedek aýdanyn evakýatsııalaý qajettigi aıtylǵan.
— Okkýpatsııalyq kúshter bul basyp alynǵan aýmaqty dereý tastap ketýi kerek, — delingen habarlamada.
Buǵan deıin Izraıl armııasy Tegerannyń ońtústigindegi 18-aýdanǵa eskertý jarııalap, bul aımaqqa shabýyl jasalatynyn málimdegen edi.
Qaqtyǵys Izraıldiń Iranǵa jappaı soqqy berýinen bastaldy.
13 maýsymda Izraıl Iran Respýblıkasynyń ártúrli qalalarynda ornalasqan ıadrolyq nysandar men eldiń joǵary áskerı basshylyǵyna qarsy aýqymdy soqqylar jasady.
Shabýyldar saldarynan Iran Qarýly kúshteri Bas shtabynyń bastyǵy, Islam revolıýtsııasy saqshylary korpýsynyń bas qolbasshysy, birneshe joǵary shendi áskerı qyzmetkerler, sondaı-aq ıadrolyq zertteýlermen aınalysatyn toǵyz ırandyq maman qaza tapty. Azamattyq halyq arasynda qaza tapqandar sany 224 adamǵa jetti.
Jaýap retinde Iran Izraıl aýmaǵyna ballıstıkalyq zymyrandarmen soqqy jasady. Resmı málimet boıynsha, bul shabýyldardan 24 adam qaza taýyp, 500-den astam adam jaralanǵan.
Túrkııany qosa alǵanda, birqatar el Izraıldiń áreketin qatań aıyptady.
Aıta ketelik kongresmender Tramptyń Izraıl-Iran qaqtyǵysyna aralasý ókilettigin shekteýge tyrysyp otyrǵany týraly jazǵan edik.