Iran Argentınanyń Áýe jáne Áskerı-teńiz kúshterin terrorıstik uıymdar tizimine engizdi
ASTANA. KAZINFORM — Tegeran men Býenos-Aıres arasyndaǵy qarym-qatynas terrorızmdi qoldaýǵa qatysty ózara aıyptaýlar aıasynda shıelenise tústi. Bul týraly Kazinform agenttiginiń menshikti tilshisi habarlady.
Iran Argentınanyń Áýe jáne Áskerı-teńiz kúshterin resmı túrde terrorıstik uıymdar tizimine engizdi. Bul sheshim Býenos-Aırestiń bıyl sáýir aıynda Irannyń Islam revolıýtsııasy saqshylar korpýsyna (IRSK) qatysty osyndaı sheshim qabyldaýyna jaýap retinde jasaldy.
Bul týraly Iran Syrtqy ister mınıstrliginiń 11 qarasha, sársenbi kúni jarııalanǵan málimdemesinde aıtylǵan. Vedomstvo sheshim ózara áreket etý qaǵıdatyna negizdelgenin túsindirdi.
بیانیه وزارت امور خارجه درباره اعلام نیروی دریایی و نیروی هوایی آرژانتین بهعنوان سازمانهای تروریستی دولت جمهوری اسلامی ایران بر اساس اصل عمل متقابل و مستند به قانون مصوب سال ۱۳۹۸، نیروی دریایی #آرژانتین و نیروی هوایی آرژانتین را به عنوان سازمانهای تروریستی اعلام میکند. https://t.co/WL6T3Uxziq
— وزارت امور خارجه (@IRIMFA) November 11, 2026
— Bul sheshimnen týyndaıtyn barlyq saldar úshin jaýapkershilik Argentına úkimetine júkteletini anyq, — delingen mınıstrlik málimdemesinde.
Irannyń IRNA aqparat agenttiginiń habarlaýynsha, bul sheshimniń quqyqtyq negizi — AQSh-tyń 2019 jyly IRSK-ny terrorıstik uıym dep tanýyna baılanysty qabyldanǵan qarsy sharalar týraly zań. Qujatta osyndaı shekteýlerdi qoldaıtyn memleketterge qatysty jaýap sharalaryn qoldaný qarastyrylǵan.
Iran Syrtqy ister mınıstrligi Islam revolıýtsııasy saqshylar korpýsy eldiń resmı qarýly kúshteriniń bir bóligi ekenin atap ótti. Tegerannyń pikirinshe, Argentınanyń bul qurylymdy terrorıstik uıym dep tanýy halyqaralyq quqyqtyń negizgi qaǵıdattaryna qaıshy keledi.
Sonymen qatar Iran tarapy Argentına qarýly kúshterin terrorıstik uıymdar tizimine engizgennen keıin qandaı naqty sharalar qabyldanýy múmkin ekenin aıtpady. Málimdemede Argentınanyń Qurlyq áskerleri týraly sóz qozǵalmaǵan.
2026 jylǵy sáýirde Argentına bıligi AQSh prezıdenti Donald Tramp ákimshiliginiń odaqtastaryn osyndaı sharalar qabyldaýǵa shaqyrýy aıasynda Irannyń Islam revolıýtsııasy saqshylar korpýsyn ulttyq terrorıstik uıymdar tizimine engizgen bolatyn.
Argentına bul sheshimin IRSK-nyń Lıvandaǵy «Hezbolla» qozǵalysymen baılanysyna negizdedi. Argentına bıligi bul uıymdy 1994 jyly Býenos-Aırestegi evreı qaýymdastyǵy ortalyǵynda bolǵan jarylysqa qatysy bar dep esepteıdi. Terrorıstik shabýyl saldarynan 85 adam qaza taýyp, júzdegen adam jaralanǵan.
Argentına, AQSh jáne Izraıl uzaq jyldar boıy Irandy «Hezbollany» qoldaý arqyly osy shabýyldy uıymdastyrdy dep aıyptap keledi.
Buǵan deıin Irannyń jańa zymyran bazasyn tanystyrǵany habarlanǵan bolatyn.
Sondaı-aq Frantsııa Irandy sýpermarketterdegi tońazytqyshtarǵa jasalǵan kıbershabýyldarǵa qatysy bar dep aıyptaǵan edi.