Iran aptap ystyqqa baılanysty qosymsha demalys kúnderin jarııalady

AMMAN.QazAqparat – Iran buryn-sońdy bolmaǵan aptap ystyqqa baılanysty osy aptanyń sársenbi jáne beısenbi kúnderin demalys dep jarııalap, qarttar men densaýlyǵynda aqaýy bar adamdardy úıden shyqpaýǵa shaqyrdy, dep habarlaıdy QazAqparat ırandyq IRNA agenttigine silteme jasap.

«Azamattardyń densaýlyǵyn saqtaý maqsatynda mınıstrler kabıneti Densaýlyq saqtaý mınıstrliginiń 2 jáne 3 tamyz kúnderin búkil el boıynsha demalys kúnderi dep jarııalaý týraly usynysyn maquldady», - dedi Iran úkimetiniń ókili Álı Bahadorı Djahromı.

Demalys kúnderi týraly habarlandyrý Irannyń Densaýlyq saqtaý mınıstri Bahram Eınollahı qazirgi jylý tolqynynyń adamdardyń kúndelikti ómirine áseri týraly eskertkennen keıin jasaldy.

Iran Densaýlyq saqtaý mınıstriniń orynbasary Saıd Karımı eldiń túkpir-túkpirindegi barlyq medıtsınalyq ortalyqtar aptap ystyqtan zardap shekkenderge kómek kórsetýge daıyn ekenin aıtty.

Irannyń ońtústigindegi kóptegen qalalar temperatýranyń joǵarylaýynan zardap shekti.

Memlekettik BAQ osy aptada Ahvaz qalasynda aýa temperatýrasy 51 gradýstan asqanyn habarlady.

«Tórt jasqa deıingi balalar, 65 jastan asqan adamdar jáne qant dıabeti, qan qysymy, júrek aýrýymen aýyratyndardyń ystyq aýa raıynyń áserine tótep berýi qıyn», - dedi Karımı.

Sońǵy aptalarda aptap ystyq tolqyny jer sharynyń kóp bóligine áser etti. Ǵalymdar temperatýranyń kóterilýin klımattyń antropogendik ózgerýimen baılanystyrady.

Climate Central-dyń sársenbi kúni jarııalaǵan esebine sáıkes, shildede 6,5 mlrd astam adam nemese jer shary halqynyń 81% klımattyń ózgerýine baılanysty ystyq tolqyndarǵa ushyraǵan.