Iran aptap ystyq pen elektr energııasynyń tapshylyǵyna baılanysty memlekettik mekemelerdi jappaq

ASTANA. KAZINFORM – Aptap ystyq pen sý deńgeıiniń tómendeýi, sonyń saldarynan elektr energııasynyń kóp tutynylýy Iran bıligin tótenshe sharalar qoldanýǵa májbúrlep otyr, dep habarlaıdy Kazinform agenttiginiń menshikti tilshisi.

Iran bıiligi aptap ystyq saldarynan elektr energııasyn tutyný kólemin azaıtý úshin sársenbi kúni birqatar provıntsııada memlekettik mekemelerdi jabý týraly sheshim qabyldady.

IRNA aqparat agenttiginiń málimetinshe, eldiń 31 provıntsııasynyń keminde 15-inde memlekettik mekemeler ne tolyq jabylady, ne qysqartylǵan jumys kúnine kóshedi.

Tizimdegi óńirler qataryna soltústik-batystaǵy Batys Ázerbaıjan men Ardebıl, ońtústikte Hormozgan, soltústikte Alborz jáne el astanay Tegeran kiredi.

Tegeran gýbernatory Mohammad Sadek Motamedıannyń habarlaýynsha, bul sheshim Energetıka mınıstrliginiń suranysy boıynsha qabyldanǵan. Maqsat — sý jáne elektr energııasy salalarynda resýrstardy tutynýdy retteý.

Shuǵyl jáne mańyzdy qyzmetter qalypty rejımde jumysyn jalǵastyrady.

Irannyń energetıka mınıstri Álı-Akbar Mehrebıan aptap ystyqtyń elde elektr energııasyn tutyný kólemin 9 paıyzǵa arttyrǵanyn málimdedi. Al bılik ókilderi bul ósim 6 paıyz bolady dep boljaǵan.

Shilde aıynyń ortasynan beri Iranda kún erekshe ystyq bolyp tur. Eldiń ońtústik óńirlerinde aýa temperatýrasy 50°C-tan asyp ketken. Bul jaǵdaı energııa júıesiniń shamadan tys júktelýine jáne búkil el boıynsha elektr qýatynyń jappaı óshýine ákeldi.

Sondaı-aq, sý qoımalaryndaǵy sý deńgeıiniń tómendeýine baılanysty bılik Tegeranda aýyzsý qysymyn azaıtýǵa májbúr boldy. Jergilikti BAQ málimetinshe, qazirgi qurǵaqshylyq — sońǵy júz jyldaǵy eń kúrdelisi.

Osyǵan deıin Qytaıda energııa júıesine túsetin júkteme aptap ystyq saldarynan rekord jańartqany týraly jazǵan edik.