Iran Álı Larıdjanıdiń ólimine jaýap retinde Izraılge soqqy jasady
ASTANA. KAZINFORM - Iran Izraılge birneshe márte zymyranmen soqqy jasady. Sonymen qatar Saýd Arabııasy, Birikken Arab Ámirlikteri jáne Irak ta Iran tarapynan jańa shabýyldar bolǵanyn habarlady, dep jazady Euronews.
Iran Tegeranǵa jasalǵan soqqylar saldarynan Islam revolıýtsııasy saqshylary korpýsy quramyndaǵy «Basıdj» jasaqtarynyń basshysy Golam Reza Súleımanı men Ulttyq qaýipsizdik joǵary keńesiniń hatshysy bolǵan joǵary laýazymdy sheneýnik Álı Larıdjanı qaza tapqannan keıin Izraıldiń ortalyq bóligine jappaı zymyran atqylady. Bul oqıǵa Islam Respýblıkasynyń basshylyǵyna aýyr soqqy retinde baǵalanyp otyr.
Álı Larıdjanı AQSh pen Izraıl júrgizgen operatsııa barysynda qaza tapqan ekinshi joǵary laýazymdy ırandyq tulǵa boldy. Buǵan deıin eldiń burynǵy joǵarǵy jetekshisi aıatolla Álı Hameneı de mert bolǵany habarlanǵan.
Izraılge baǵyttalǵan Iran zymyrandarynyń basym bóligin áýe qorǵanys júıeleri qaǵyp túsirgen. Degenmen Iran soqqylary saldarynan Izraıldiń ortalyq bóligindegi Ramat-Gan qalasynda eki adam qaza taýyp, ózge eldi mekenderde birneshe adam jaraqat aldy. Bul týraly «Magen Davıd Adom» medıtsınalyq qyzmeti málimdedi.
Iran sársenbi kúni tańerteń Izraılge birneshe kassetalyq oqtumsyqtarmen jabdyqtalǵan zymyrandar ushyrylǵanyn rastady. Mundaı qarý túri barynsha kóp zalal keltirýge jáne Izraıldiń kópdeńgeıli áýe qorǵanys júıelerin aınalyp ótýge arnalǵan.
Sársenbi kúni Izraıl áskeri Tegerandaǵy birneshe áskerı shtabqa áýe soqqylary jasalǵanyn habarlady.
Izraıl qorǵanys armııasynyń málimetinshe, nysandar qatarynda aıatolla rejımine qarsy narazylyqtardy basýǵa jaýapty Islam revolıýtsııasy saqshylary korpýsynyń qaýipsizdik bólimshesiniń shtaby, ishki qaýipsizdik kúshteriniń tehnıkalyq qyzmet kórsetý ortalyǵy jáne Irannyń ballıstıkalyq zymyran kúshteriniń shtaby bolǵan. Sondaı-aq Irannyń birneshe áýe qorǵanys júıesine soqqy jasalǵany aıtyldy.
Keıin Izraıl áskerıleri Iranda barlaý mınıstri Esmaıl Hatıbtiń qaza tapqanyn habarlady.
