Iran alǵash ret Isfahan aspanynda ushqyshsyz uqshatyn apparatty atyp túsirdi

ASTANA. KAZINFORM – Izraıl ushqyshsyz ushatyn apparatynan aıyrylǵanyn moıyndady, alaıda joıǵysh ushaǵynyń atyp túsirilgenin joqqa shyǵardy, dep habarlaıdy Kazinform agenttiginiń menshikti tilshisi.

Iran qarýly kúshteri seısenbige qaraǵan túni eldiń ortalyq bóligindegi Isfahan qalasy mańynda Izraıldiń ushqyshsyz ushatyn apparatyn atyp túsirgenin málimdedi.

Irannyń memlekettik IRIB telearnasynyń málimetinshe, áńgime Izraıl áskerı áýe kúshteri qoldanatyn Hermes 900 barlaý ushaǵy týraly bolyp otyr. Efırden ushqyshsyz apparattyń synyqtary kórsetildi.

The Times of Israel basylymynyń habarlaýynsha, bul alǵash ret bolyp otyrǵan oqıǵa.

Keıinirek Izraıl Qorǵanys armııasy (TsAHAL) bul oqıǵany rastap, urys barysynda Izraılge tıesili ushqyshsyz ushatyn apparat Iran aýmaǵynda zymyranmen atyp túsirilgenin málimdedi.

— Ushqyshsyz apparat qulady, alaıda qupııa málimetterdiń taraý qaýpi joq, — delingen málimdemede.

Izraıl áskeri ókilderiniń aıtýynsha, olar jumadan bastap Irannyń batys óńirleri men Tegerannyń áýe keńistigin qosa alǵanda óz bazalarynan 1500 shaqyrymnan astam qashyqtyqta operatsııalar júrgizip keledi.

Izraıldiń áskerı áýe kúshteri osy ýaqytqa deıin 70-ten astam ırandyq zenıttik batareıany joıyp, áýe ústemdigin qamtamasyz etý úshin shabýyldaryn jalǵastyrǵan.

- Áýede ústemdikke ıe bolý úshin jedel josparda kórsetilgen túrli qıyndyqtarǵa toly bastamalardy júzege asyrý kerek,- dedi Izraıl áskerı vedomstvosynyń ókilderi.

Sonymen qatar Izraıldiń qorǵanys armııasy Isfahan aspanynda bolǵan oqıǵany tergeý jumystary áli júrip jatqanyn jetkizdi.

F-35 joıǵysh ushaǵy týraly habar

Irannyń buqaralyq aqparat quraldary taratqan málimetke sáıkes, Tegerannyń ońtústigindegi Djavadabad aımaǵynda túngi urys qımyldary kezinde Izraılge tıesili besinshi býynǵa jatatyn F-35 joıǵysh ushaǵy atyp túsirilgen bolýy múmkin.

Bul týraly IRNA resmı agenttigi eldiń Qarýly kúshterindegi derekkózderge silteme jasap habarlady. Alaıda bul málimdemeni rastaıtyn naqty dálelder joq.

Izraıl jaǵy bul aqparatqa túsinikteme berýden bas tartyp, buǵan deıin Iran aýmaǵynda birde-bir joıǵysh ushaǵyn joǵaltpaǵanyn málimdegen bolatyn.

Osyǵan deıin Izraılde soǵys jaǵdaıyndaǵy tergeýge shekteý qoıylatyny týraly jazdyq.