Iran AQSh ushaǵyn atyp túsirgenin málimdedi: ushqyshty izdeý jumystary júrip jatyr
ASTANA. KAZINFORM – AQSh pen Iran 3 sáýir, juma kúni joǵalyp ketken amerıkalyq ushqyshty qatar izdestirý jumystaryn júrgizip jatyr, dep habarlaıdy Kazinform agenttiginiń menshikti tilshisi.
Irannyń memlekettik BAQ-tary juma kúni el aýmaǵynda amerıkalyq áskerı ushaqtyń atyp túsirilgenin málimdedi. Atap aıtqanda, Mehr agenttiginiń habarlaýynsha, joıǵysh ushaq Irannyń ortalyq bóliginde áýe qorǵanysy júıesi arqyly atyp túsirilgen. Osydan keıin AQSh tarapynan izdestirý-qutqarý operatsııasy bastalǵan.
Iran Qarýly kúshteriniń «Hatam ál-Anbııa» ortalyq shtabynyń ókili Ibragım Zolfagarı memlekettik telearna efırinde ushaqtyń «jańa ozyq áýe qorǵanysy júıesimen» joıylǵanyn málimdep, bul AQSh-tyń Irannyń PVO júıesi álsiregeni týraly málimdemelerin joqqa shyǵaratynyn atap ótti.
Ushaqtyń naqty qaı jerde qulaǵany belgisiz. Degenmen ırandyq BAQ-ta Hýzestan jáne Kohgılýıe-Boıerahmad provıntsııalary jıi atalyp otyr.
Sonymen qatar Iran tarapy ózge de nysandarǵa soqqy jasalǵanyn málimdedi. Atap aıtqanda, Ormýz buǵazy mańynda amerıkalyq A-10 shabýyldaýshy ushaǵy zaqymdanǵany, sondaı-aq qutqarý operatsııasyna qatysqan tikushaqtarǵa soqqy berilgeni habarlandy. Iran derekterine sáıkes, ekıpajdy evakýatsııalaý kezinde tikushaqtardyń biri zaqymdanǵan.
Irannyń Kohgılýıe-Boıerahmad provıntsııasynyń gýbernatory ushqyshty «tirideı qolǵa túsirý» basty mindet ekenin málimdedi. Sondaı-aq ırandyq BAQ joǵalǵan amerıkalyq ushqysh týraly aqparat úshin 10 mlrd toman (shamamen 64 myń AQSh dollary) kóleminde syıaqy jarııalanǵanyn habarlady.
Amerıkalyq BAQ resmı tulǵalarǵa silteme jasap, ushaqtyń joǵalǵanyn jáne Irannyń ońtústik-batysynda izdestirý-qutqarý operatsııasy júrgizilip jatqanyn rastady. Málimetterge sáıkes, ol F-15E joıǵysh ushaǵy. Ekıpajdyń eki múshesiniń biri qutqarylǵan, ekinshisi iz-túzsiz joǵalǵan.
Operatsııaǵa Black Hawk tikushaqtary men A-10 Warthog ushaqtary tartylǵan.
CBS News málimetinshe, qutqarylǵan ushqyshty evakýatsııalaǵan tikushaqqa oq atylyp, ekıpaj músheleri jaraqat alǵan. Alaıda áýe kemesi qaýipsiz aımaqqa jetip, qonǵan. Sondaı-aq A-10 ushaǵynyń zaqymdanyp, onyń ushqyshy katapýlt arqyly qutqarylyp, keıin evakýatsııalanǵany habarlandy.
NBC News amerıkalyq sheneýnikke silteme jasap, atysqa qaramastan «barlyq áskerı qyzmetkerler qaýipsiz jerde» ekenin málimdedi.
Reuters dereginshe, ekıpaj músheleriniń biri qutqarylyp, ekinshisin izdeý jalǵasyp jatyr. Operatsııa aımaǵynda janarmaı quıý ushaqtary men qoldaý avıatsııasynyń belsendiligi tirkelgen, bul mıssııanyń joǵary basymdyqqa ıe ekenin kórsetedi.
Osy jaǵdaı aıasynda Izraıl áskeri operatsııa júrip jatqan aýmaqtaǵy soqqylar qarqyndylyǵyn ýaqytsha tómendetkeni habarlandy.
Izraıldiń 12-arnasynyń málimetinshe, joǵalǵan ekinshi amerıkalyq ushqysh shıfrlanǵan radıobaılanys arqyly baılanysqa shyqqan. Іzdestirý-qutqarý jumystary tańǵa deıin jalǵasatyny aıtyldy.
AQSh prezıdenti Donald Tramp NBC News arnasyna bergen suhbatynda bul oqıǵa Iranmen kelissózderge áser etpeıtinin málimdep, jaǵdaıdy «soǵystyń bir bóligi» dep baǵalady.
Sonymen qatar ol joǵalǵan ushqyshqa zııan keltirilgen jaǵdaıda AQSh-tyń qandaı áreket jasaıtynyna qatysty pikir bildirýden bas tartty. Aq úı ushqyshtyń aman-esen tabylatynyna úmit artyp otyr.
Aq úıde jaǵdaıǵa baılanysty prezıdenttiń jarııa belsendiligi shektelgen. Amerıkalyq derekkózderge sáıkes, Donald Tramp operatsııa barysy týraly tolyq aqparat alyp otyr jáne bul mıssııa áskerı basshylyq úshin basym baǵyttardyń biri sanalady.
Aıta keteıik, buǵan deıin AQSh-tyń Iranmen soǵysta bir kúnde eki áskerı ushaǵynan aıyrylǵany habarlandy.
