Iran AQSh-tyń soqqysy óńirlik soǵys qaýpine alyp kelýi múmkin ekenin eskertti

ASTANA. KAZINFORM — Irannyń rýhanı kósemi Álı Hameneı AQSh jaǵynan bolýy múmkin agressııa jergilikti aýqymmen shektelmeı, keń kólemdegi óńirlik soǵysqa ulasýy múmkin ekenin málimdedi. 

— Biz eshqashan soǵysty bastamaımyz, alaıda kez kelgen shabýylǵa joıqyn soqqymen jaýap beremiz, — dedi Álı Hameneı.

Ol Islam revolıýtsııasynyń jeńisine 47 jyl tolýy qarsańynda ótken jıyndaǵy sózinde ulttyq qaýipsizdik máselelerine, el ishindegi sońǵy tártipsizdikterge, sondaı-aq AQSh-pen arada uzaq jyldar boıy jalǵasyp kele jatqan teketirestiń negizgi sebepterine toqtaldy.

IRNA agenttiginiń habarlaýynsha, Iran basshysy elde jýyrda bolǵan tolqýlardy memlekettik tóńkeris jasaý áreketimen salystyrdy. 

Onyń aıtýynsha, polıtsııaǵa, memlekettik mekemelerge, meshitter men bankterge jasalǵan shabýyldardyń maqsaty — eldegi basqarý júıesin turaqsyzdandyrý. Alaıda bul «astyrtyn jospar» sátti túrde toqtatyldy.

Eske sala keteıik, 2025 jyldyń jeltoqsan aıynyń sońynda ekonomıkalyq jaǵdaıdyń nasharlaýy, ulttyq valıýtanyń kúrt qunsyzdanýy jáne ınflıatsııanyń ósýi aıasynda Tegeranda jappaı narazylyq aktsııalary bastalyp, keıin olar eldiń ózge qalalaryna da taraǵan edi.

Osy oqıǵalardan keıin jaqynda AQSh-tyń ushaqtasymaldaǵysh toby Taıaý Shyǵysqa jetti. 

Irannyń syrtqy ister mınıstri Abbas Arakchıdiń sózine qaraǵanda, AQSh tarapynan soqqy jasaý qaýpine qaramastan, Tegeran Vashıngtonmen ıadrolyq baǵdarlama boıynsha kelisimge qol jetkizý múmkin ekenine senimdi.

Avtor: Arýjan Jánádil