Iran AQSh-tyń Parsy shyǵanaǵyndaǵy áskerı nysandaryna soqqy jasalǵanyn málimdedi

Irannyń Islam revolıýtsııasy saqshylar korpýsy jeksenbi kúni Katardaǵy Ál-Ýdeıd, Kýveıttegi Arıfjan jáne Álı ás-Salem áýe bazalaryna, Bahreındegi Jýfaır men Sheıh Isa áýe bazasyndaǵy nysandarǵa, sondaı-aq Iordanııadaǵy Hanzada Hasan atyndaǵy áýe bazasyndaǵy amerıkalyq áskerı ınfraqurylymǵa soqqy jasalǵanyn habarlady. Bul týraly Irannyń memlekettik IRIB telearnasy málimdedi.

Sonymen qatar Iran armııasy Kýveıt pen Bahreındegi amerıkalyq áskerı ınfraqurylymǵa soqqy beretin ushqyshsyz ushý apparattary qoldanylǵanyn málimdedi.

Tegerannyń málimetinshe, shabýyldyń negizgi nysanalary radıolokatsııalyq stantsııalar, Patriot áýe qorǵanysy júıesiniń elementteri, oq-dári qoımalary men baılanys nysandary bolǵan. Sondaı-aq Iran buqaralyq aqparat quraldary Omandaǵy Dýkm portynda ornalasqan AQSh kúshteriniń materıaldyq-tehnıkalyq qamtamasyz etý nysandaryna da soqqy jasalǵanyn habarlady.

Islam revolıýtsııasy saqshylar korpýsy bul operatsııa Irannyń ońtústigine jasalyp jatqan amerıkalyq shabýyldarǵa jaýap ekenin málimdep, eger AQSh áskerı is-qımyldy jalǵastyrsa, jaýap sharalarynyń aýqymy keńeıetinin eskertti.

Aımaq elderiniń reaktsııasy

Qatar bıligi áýe shabýylyna qarsy qorǵanys kúshteri zymyrandardy áýede joıǵanyn málimdedi. Osydan keıin eldiń Іshki ister mınıstrligi turǵyndardy úılerinde nemese qaýipsiz oryndarda bolýǵa shaqyrdy.

Birikken Arab Ámirlikteriniń Qorǵanys mınıstrligi eldiń áýe qorǵanysy júıeleri zymyrandar men ushqyshsyz ushý apparattarynyń shabýylyn toıtarǵanyn habarlady. Vedomstvonyń málimetinshe, eldiń ártúrli óńirinde estilgen jarylystar áýe nysandaryn joıý kezinde bolǵan.

Bahreınde eki ret áýe dabyly jarııalandy. Eldiń Іshki ister mınıstrligi turǵyndardy jaqyn mańdaǵy qaýipsiz oryndarǵa barýǵa úndedi.

Kýveıt áskeri áýe keńistigine engen nysandardyń joıylǵanyn habarlady. Keıin bılik úsh ballıstıkalyq zymyran, bir qanatty zymyran jáne on ushqyshsyz ushý apparaty atyp túsirilgenin málimdedi. Zymyran synyqtarynyń qulaýynan bir adam jaraqat alǵan. Kýveıttiń Syrtqy ister mınıstrligi bul shabýyldy el egemendigin óreskel buzý dep baǵalady.

Iordanııa Qarýly kúshteri jeksenbi kúni tańerteń Iran aýmaǵynan ushyrylǵan úsh zymyran el aýmaǵyna qulaǵanyn habarlady. Áskerılerdiń málimetinshe, qaza tapqandar men zardap shekkender joq, tek azdaǵan materıaldyq shyǵyn keltirilgen.

Iordanııanyń Bas qolbasshylyǵy eldiń áýe keńistigi men aýmaǵy qandaı da bir áskerı qaqtyǵys alańyna aınalýyna jol bermeıtinin jáne ulttyq qaýipsizdikke tóngen kez kelgen qaterge qatań jaýap beretinin málimdedi.

AQSh pen Irannyń málimdemeleri

AQSh Qorǵanys mınıstri Pıt Hegset Irannyń «sátsiz sheshim qabyldaǵanyn» aıtyp, onyń saldary úshin jaýap beretinin málimdedi.

Al Iran parlamentiniń tóraǵasy ári AQSh-pen jasalatyn memorandým boıynsha bas kelissóz júrgizýshi Muhammed Baǵer Ǵalıbaf «birjaqty kelisimder dáýiri aıaqtaldy» dep málimdedi.

AQSh tarapynyń dereginshe, shamamen 140 áskerı nysanǵa soqqy jasalǵan. Olardyń qatarynda zymyran jáne ushqyshsyz ushý apparattary bólimsheleriniń bazalary, áskerı-teńiz ınfraqurylymy, oq-dári qoımalary, baılanys júıeleri men jaǵalaý qorǵanysy nysandary bar.

Iran buqaralyq aqparat quraldarynyń habarlaýynsha, Bender-Abbas, Sırık, Chabahar, Asalýıe, Býsher, Bandar-e Deır, Jask qalalarynda, sondaı-aq Hýzestan provıntsııasyndaǵy Abadan, Mahshahr jáne Hendıdjan qalalarynda jarylystar bolǵan.

IRIB telearnasy men Mehr agenttiginiń málimetinshe, shabýyldar saldarynan birqatar áskerı nysan, onyń ishinde kazarmalar men áskerı beketter zaqymdanǵan.

Buǵan deıin AQSh Iranǵa qarsy jańa áýe shabýyldarynyń bastalǵanyn málimdegen edi.