Iran AQSh-tyń keme qatynasyna qatysty jańa sanktsııalaryn aıyptady
ASTANA.KAZINFORM - Iran Syrtqy ister mınıstrligi AQSh-tyń munaı ónerkásibine qarsy jańa sanktsııalary negizsiz jáne halyqaralyq standarttarǵa qaıshy dep sanaıdy, dep jazady Kazinform-nyń menshikti tilshisi.
IRNA aqparat agenttiginiń habarlaýynsha, Iran juma kúni Vashıngtonnyń keme qatynasyna qatysty sanktsııalar engizý týraly sheshimin aıyptap, bul onyń seriktesterimen zańdy saýda jasaýyna kedergi keltiretinin málimdedi.
- AQSh jańa ákimshiliginiń Irannyń ekonomıkalyq seriktesterimen zańdy saýdasyna kedergi jasaý arqyly Iran halqyna qysym jasaý týraly sheshimi zańsyz, - dedi Iran Syrtqy ister mınıstrliginiń baspasóz hatshysy Esmaıl Bagaı.
AQSh Qarjy mınıstrligi beısenbi kúni jyl saıyn Qytaıǵa mıllıondaǵan barrel Iran munaıyn jetkizýge kómektesetin birneshe uıymǵa, jeke tulǵalarǵa jáne tankerlerge jańa sanktsııalar salatynyn málimdedi.
Bul AQSh prezıdenti Donald Tramp osy aptada Tegeranǵa «eń joǵarǵy qysym» kórsetý týraly memorandýmǵa qol qoıyp, Irannyń shıki munaı eksportyn nólge deıin tómendetýge ýáde bergennen keıin Iran munaıyna qatysty AQSh engizgen alǵashqy sanktsııalar bolyp tabylady. Bul qadam Islam Respýblıkasynyń ıadrolyq áleýetin shekteý áreketteriniń bir bóligi retinde qarastyrylýda.
AQSh Qarjy mınıstrligi sondaı-aq Iran munaı satýdan túsken qarjyny ıadrolyq baǵdarlamasyn damytýǵa ınvestıtsııalaýǵa jáne kórshiles elderdegi terrorızmdi qoldaýǵa jumsaıdy dep málimdeıdi.