Iran AQSh-tyń Bahreın, Kýveıt jáne Iordanııadaǵy nysandaryna qaıta soqqy jasady
ASTANA. KAZINFORM — Iran qarýly kúshteri AQSh-tyń Islam Respýblıkasyna jasaǵan kezekti shabýyldaryna jaýap retinde Bahreın, Kýveıt jáne Iordanııadaǵy amerıkalyq nysandarǵa qaıtadan zymyran jáne drondarmen soqqy jasady, dep habarlaıdy Sınhýa.
Bul týraly Irannyń Islam revolıýtsııasy saqshylar korpýsynyń (KSIR) Sepah News resmı aqparattyq portalynda jarııalanǵan málimdemede aıtylǵan.
Málimdemege sáıkes, KSIR-diń Áýe-ǵarysh kúshteri Bahreın men Kýveıttegi AQSh-tyń áýe qorǵanysy júıelerine, radıolokatsııalyq stantsııalaryna, baılanys ınfraqurylymyna jáne basqa da áskerı nysandaryna, sondaı-aq Iordanııadaǵy amerıkalyq áskerı nysandarǵa soqqy bergen.
KSIR bul shabýyldardyń AQSh-tyń soqqylaryna jaýap retinde jasalǵanyn jáne óńirdegi amerıkalyq áskerı nysandarǵa qarsy aýqymdy zymyrandyq ári drondyq operatsııalarǵa jol ashýǵa baǵyttalǵanyn málimdedi.
Budan bólek, Iran armııasy Kýveıt pen Bahreındegi AQSh-tyń birneshe áskerı nysanyna, sonyń ishinde Arıfdjan áskerı bazasyna, Ahmad ál-Jaber jáne Sheıh-Isa áýe bazalaryna zymyrandar jáne ushqyshsyz ushý apparattary arqyly soqqy jasaǵanyn habarlady.
Sondaı-aq KSIR Bahreındegi Amazon kompanııasynyń derekterdi óńdeý ortalyǵyna shabýyl jasaǵanyn málimdedi. Iran tarapy muny AQSh-tyń eldiń ońtústik-batysyndaǵy salynyp jatqan «Darhoveın» atom elektr stantsııasyna jasaǵan soqqysyna jaýap dep atady.
Aıta keteıik, Irannyń Taıaý Shyǵystaǵy bazalarǵa jasaǵan áýe shabýyldarynan shamamen AQSh-tyń 100 áskerı qyzmetshisi jaraqat aldy.
