Iran AQSh-tyń atysty toqtatý týraly jańa usynysyna jaýap berdi
ASTANA. KAZINFORM - Iran AQSh usynǵan jańa bitim jobasyna qatysty jaýabyn pákistandyq deldaldar arqyly joldady, dep habarlaıdy Euronews.
Iran memlekettik telearnasynyń habarlaýynsha, Tegeran kelissózderdiń basty taqyryby retinde soǵysty tolyq toqtatýdy usynyp otyr.
Iran bul talaptyń tek óz aýmaǵyna emes, barlyq maıdanǵa qatysty bolǵanyn qalaıdy.
Atap aıtqanda, Lıvan aýmaǵyndaǵy qaqtyǵystardy toqtatyp, teńiz joldarynyń qaýipsizdigin qamtamasyz etý máselesin kótergen.
Izraıl Lıvanda «Hezbolla» uıymyna qarsy áskerı operatsııasyn jalǵastyryp keledi.
Vashıngtonnyń sońǵy usynysynda soǵysty toqtatý, Ormýz buǵazyndaǵy keme qozǵalysyn qalpyna keltirý jáne Irannyń ıadrolyq baǵdarlamasyn qysqartý máseleleri qamtylǵan.
Alaıda Tegeran ıadrolyq baǵdarlamaǵa qatysty áńgimeni keıinirek talqylaýdy jón kórip otyr.
Ázirge Aq úı Irannyń jaýabyna resmı túsinikteme bergen joq.
AQSh-tyń BUU janyndaǵy elshisi Maık Ýolts prezıdent Donald Tramptyń barlyq dıplomatııalyq múmkindikterdi qarastyryp otyrǵanyn málimdedi.
Sonymen qatar jeksenbi kúni álsiz bitim rejımi taǵy synǵa tústi.
Qatar jaǵalaýynda belgisiz dron shabýylynan keıin kemelerdiń birinen órt shyqqan.
Al Birikken Arab Ámirlikteri pen Kýveıt óz áýe keńistigine drondar kirgenin habarlady.
BAÁ bul shabýylǵa Irandy aıyptady.
Ázirge zardap shekkender týraly aqparat túsken joq. Shabýyl úshin jaýapkershilikti eshbir tarap moınyna almaǵan.
Qatar syrtqy ister mınıstrligi bul oqıǵany aımaqtaǵy teńiz saýdasy men mańyzdy jetkizý tizbekterine qaýip tóndiretin «qaýipti eskalatsııa» dep atady.
Buǵan deıin Donald Tramp Iran Ormýz buǵazyn ashyp, ıadrolyq baǵdarlamasynan bas tartpasa, keń aýqymdy bombalaý qaıta bastalýy múmkin ekenin eskertken edi.
Iran álemdik munaı tasymaly úshin asa mańyzdy sanalatyn Ormýz buǵazyn japqan. Bul sheshim jahandyq naryqtaǵy turaqsyzdyqty kúsheıtken.
Óz kezeginde AQSh Iran porttaryna blokada engizdi.
Juma kúni amerıkalyq áskerıler blokadany buzýǵa áreket jasady degen kúdikpen eki ırandyq munaı tankerine soqqy jasaǵan.
Al Islam revolıýtsııasy saqshylary korpýsy Iran kemelerine shabýyl jasalsa, aımaqtaǵy amerıkalyq bazalar men qarsylas kemelerge aýyr soqqy beriletinin málimdedi.
Kelissózdegi negizgi daýly máselelerdiń biri — Irannyń joǵary deńgeıde baıytylǵan ýrany bolyp otyr.
BUU-nyń ıadrolyq baqylaý agenttiginiń deregine sáıkes, Iranda 60 paıyzǵa deıin baıytylǵan 440 keliden astam ýran qory bar.
AQSh Tegerandy ıadrolyq qarý jasaýǵa umtylyp otyr dep kúdiktenedi jáne bul baǵdarlamadan tolyq bas tartýdy talap etip keledi.
Osyǵan deıin Irannyń AQSh-qa jańa kelisim jobasyn Pákistan arqyly joldaǵany týraly jazdyq.
