Iran AQSh-ty Parsy shyǵanaǵyn lastady dep aıyptady
ASTANA. KAZINFORM – Tegeran Parsy shyǵanaǵy men Oman teńizine keltirilgen ekologııalyq zalal úshin ótemaqy talap etýge nıetti, dep habarlaıdy Kazinform agenttiginiń Taıaý Shyǵystaǵy menshikti tilshisi.
Iran SІM resmı ókili Esmaıl Bagaı dúısenbide AQSh áskerı kúshteriniń qatysýy jáne Vashıngtonnyń aımaqta júrgizgen operatsııalary Parsy shyǵanaǵy men Oman teńizi sýlaryn kópjyldyq lastanýyna ákeldi dep kinálady, dep habarlaıdy IRNA.
- Bul ekologııalyq zalal AQSh-tyń áskerı qatysýy jáne olardyń sońǵy bes onjyldyqta aımaqta júrgizgen soǵystarynyń saldary. Parsy shyǵanaǵy men Oman teńizinde qorshaǵan ortaǵa keltirilgen zalal tek sońǵy soǵyspen ǵana baılanysty emes, - dep málimdedi Bagaı dúısenbide ótken brıfıngte.
Onyń aıtýynsha, qorshaǵan ortaǵa keltirilgen zalaldyń kólemi trıllıondaǵan dollarǵa jetýi múmkin. Iran bul úshin AQSh pen basqa taraptardy jaýapkershilikke tartýǵa nıetti.
SІM ókiliniń atap ótýinshe, sońǵy eki jylda AQSh pen Izraıldiń Iranǵa jáne Parsy shyǵanaǵy aımaǵyndaǵy nysanalarǵa shabýyldary saldarynan qorshaǵan ortaǵa áser artqan.
Ol lastanýdyń saldary tek Iranǵa emes, sonymen qatar aımaqtaǵy basqa memleketterge de áser etetinin atap ótti.
Bul málimdeme jaqynda Ormýz buǵazynda munaı tógilgennen keıin jasaldy. Ótken aptada munaı daǵy Irannyń Keshm aralynyń jaǵalaýyna jetip, jaǵajaılar men ekologııalyq turǵydan sezimtal mangr ormandaryna áser etti.
Bagaı sol kezde aldyn ala málimetterge silteme jasaı otyryp lastaný kózi sheteldik júk kemesi bolǵanyn habarlady.
Iran keltirilgen zalal úshin ótemaqy talap etti. Keıinirek el bıligi tógilgen munaı tolyǵymen tazartylǵanyn málimdedi.
Naýryz aıynda Irandaǵy áýe soqqylarynan keıin Tegeranda «qara jańbyr» jaýyp, aýa lastanǵanyn jazdyq.
