Iran AQSh-tan buǵattalǵan aktıvteriniń jartysyn dereý qaıtarýdy talap etti
ASTANA. KAZINFORM — Iran AQSh-pen ózara túsinistik týraly memorandýmǵa qol qoıylǵannan keıin shetelde buǵattalǵan aktıvteriniń keminde 50 paıyzyn birden alýdy josparlap otyr. Bul týraly Iran syrtqy ister mınıstriniń orynbasary Kazem Garıbabadı málimdedi, dep habarlaıdy TASS.
Onyń aıtýynsha, Iran men Vashıngton arasyndaǵy kelissózderde buǵattalǵan qarajatty qaıtarý máselesi negizgi taqyryptardyń biri bolyp otyr.
Iran tarapy kelisim jasalǵannan keıin buǵattalǵan aktıvterdiń keminde jartysy birden elge qaıtarylýyn talap etti.
Garıbabadı qalǵan qarjyny berý tártibi men merzimi boıynsha taraptardyń áli de kelissóz júrgizip jatqanyn atap ótti.
Syrtqy ister mınıstriniń orynbasary bul másele AQSh tarapynan qarjylyq kómek nemese jańa mindettemeler týraly emes ekenin aıtty. Onyń sózinshe, áńgime AQSh sanktsııalaryna baılanysty buǵattalǵan, Iranǵa tıesili qarajat týraly bolyp otyr.
— Bul — AQSh-tyń zańsyz buǵattap tastaǵan Irannyń aqshasy, — dedi dıplomat.
Sondaı-aq ol shekteýler úshinshi el arqyly da qarajatty aýdarýǵa kedergi keltirip otyrǵanyn jetkizdi.
Tegeran bul aktıvterdi bosatýdy Vashıngtonmen bolashaq kelisimderdiń mańyzdy sharty dep sanaıdy jáne kelissóz barysynda osy máseleni sheshýge nıetti.
Buǵan deıin AQSh Irannyń 6 mlrd dollar kólemindegi aktıvterin buǵattan bosatýǵa daıyn ekeni habarlanǵan. Bul qarajat 2023 jyly Dohanyń araǵaıyndyǵymen AQSh pen Iran arasyndaǵy tutqyn almasý kelisiminen keıin Katar bankterine aýdarylǵan bolatyn.
Aıta keteıik, AQSh Iranǵa qarsy blokada kezinde 118 kemeniń baǵytyn ózgertti.
