Iran AQSh-tan 24 mlrd dollardy qaıtarýdy talap etti
ASTANA. KAZINFORM — AQSh pen Iran arasyndaǵy kelissózder tyǵyryqqa tireldi. Irannyń joǵary kóshbasshysynyń keńesshisi Mohsen Rezaı Vashıngton men Tegeran arasyndaǵy yqtımal kelisimniń taǵdyry AQSh ákimshiliginiń Irannyń 24 mlrd dollar kólemindegi buǵattalǵan aktıvterin bosatý týraly sheshimine baılanysty ekenin málimdedi, dep habarlaıdy CNN telearnasy.
Rezaıdiń aıtýynsha, Tegeran aralyq kelisimge qol qoıylǵannan keıin birden 12 mlrd dollardyń bosatylýyn kútedi. Iran tarapy qalǵan 12 mlrd dollar keıinirek qaıtarylady dep úmittenedi.
Joǵary laýazymdy ırandyq ókil aktıvterdi buǵattan shyǵarý eki el arasyndaǵy senimniń synaǵy ekenin aıtty. Ol bul qarajattyń AQSh kómegi emes, Iranǵa tıesili aqsha ekenin erekshe atap ótti.
– Kelissózder tyǵyryqqa tireldi. Endi sheshim Donald Trampqa baılanysty, – dedi Rezaı CNN arnasyna bergen suhbatynda.
Derekkóz málimetinshe, amerıkalyq tarap qarajatty bosatý ıdeıasyn saqtyqpen qarastyryp otyr. Vashıngtonda kelissózder aıaqtalmaı turyp aqsha berý AQSh-tyń ustanymyn álsiretýi múmkin dep esepteıdi.
Donald Tramp ákimshiligi 2015 jylǵy ıadrolyq kelisimnen de qatań sharttardy kózdeıtin jańa kelisimge qol jetkizýge umtylyp otyr. Aq úı sondaı-aq Tegeranǵa qarjylyq jeńildik jasaldy dep qabyldanýy múmkin qadamdardan aýlaq bolýǵa tyrysady.
Rezaı qaqtyǵys qaıta bastalǵan jaǵdaıda Iran áskerı operatsııalar aýqymyn edáýir keńeıtýge daıyn ekenin eskertti.
Onyń sózinshe, yqtımal áreketter tek Parsy shyǵanaǵyn ǵana emes, Ormýz buǵazyn, Úndi muhıtyn, Bab-el-Mandeb buǵazyn, Qyzyl teńizdi jáne Jerorta teńizin qamtýy múmkin.
Donald Tramp pen Irannyń joǵary kóshbasshysy arasyndaǵy yqtımal baılanystar týraly suraqqa jaýap bergen Rezaı mundaı stsenarıı qazir qarastyrylyp jatpaǵanyn aıtty.
Onyń sózinshe, kelissózder protsesi áli bastapqy kezeńde bolǵandyqtan, eki el basshylarynyń kezdesýi týraly aıtýǵa erte.
Buǵan deıin Iran syrtqy ister mınıstriniń orynbasary Kazem Garıbabadı de Tegeran AQSh-pen ózara túsinistik týraly memorandýmǵa qol qoıylǵannan keıin sheteldegi buǵattalǵan aktıvteriniń keminde 50 paıyzyn birden alýǵa úmittenetinin málimdegen edi.
Onyń aıtýynsha, ırandyq qarajatty buǵattan shyǵarý máselesi Tegeran men Vashıngton arasyndaǵy kelissózderdiń negizgi tarmaqtarynyń biri bolyp qala beredi.
