Iran AQSh soqqylary ıadrolyq nysandarǵa eleýli zııan tıgizgenin málimdedi

ASTANA.KAZINFORM — Iran Syrtqy ister mınıstri Abbas Aragchı CBS News telearnasyna bergen suhbatynda AQSh-tyń soqqysynan Irannyń ıadrolyq nysandaryna qatty zaqym kelgenin aıtty, dep habarlaıdy Kazinform. 

— Fordoda ne bolǵanyn eshkim naqty bilmeıdi. Alaıda, qazirgi ýaqytta belgili bolǵany, nysandardyń aıtarlyqtaı qatty zaqymdalǵany. Iran Islam Respýblıkasynyń Atom energııasy uıymy baǵalaý jáne taldaý jumystaryn júrgizip jatyr, esep úkimetke usynylady, — dedi Abbas Aragchı ıadrolyq nysandaǵy jaǵdaı týraly suraqqa jaýap bere otyryp.

Ol zalaldyń sıpaty týraly naqty aqparatqa ıe emes ekenin jáne nysandardy qaıtadan iske qosýǵa bolatyn-bolmaıtynyn túsiný úshin esepterdi kútý kerektigin aıtty.

— Irannyń beıbit maqsattaǵy ıadrolyq baǵdarlamasy ulttyq maqtanysh pen abyroı isine aınaldy. Biz, árıne, halyqaralyq qaýymdastyq pen múddeli elderdi bizdiń baǵdarlamamyzdyń, ıadrolyq baǵdarlamamyzdyń múldem beıbit sıpatta bolatynyna sendirýdi jalǵastyramyz, — dedi Iran Syrtqy ister mınıstri.

Tegerannyń amerıkalyq taraptyń málimdemelerine qaramastan, AQSh-pen kelissózderdi qaıta bastaýǵa áli kelisim bermegeni buǵan deıin habarlanǵan. AQSh prezıdenti Donald Tramp buǵan deıin amerıkalyqtardyń soqqysy Irannyń ıadrolyq nysandaryn «joıǵanyn» birneshe ret málimdep, kelissózderdiń jaqyn arada qaıta bastalatynyna senim bildirdi. 

Aıta ketelik Iranda Izraıl shabýyldarynan qaza tapqandar sany 950 adamǵa jetkeni týraly jazǵan edik.