Iran AQSh-pen josparlanǵan kelissózden bas tartty

ASTANA. KAZINFORM — Iran amerıkalyq tarapqa Islamabadta ótetin kelissózderge qatyspaıtynyn jetkizdi. Jıyn búgin, ıaǵnı 22 sáýirge josparlanǵan, dep habarlaıdy Report.

— Iran delegatsııasy Pákistan arqyly amerıkalyq tarapqa sársenbi kúni kelissózder Islamabadta bolmaıtynyn jáne qazirgi ýaqytta oǵan qatysýǵa eshqandaı múmkindik joq ekenin jetkizdi, — delingen habarlamada.

Derekkózdiń málimdeýinshe, Iran mundaı sheshimdi AQSh óz mindettemelerin oryndamaǵandyqtan qabyldaǵan.

Eske sala keteıik, 28 aqpanda AQSh pen Izraıl Iranǵa qarsy áskerı operatsııa bastap, birqatar qalaǵa soqqy jasaǵan bolatyn. Bul qadam Taıaý Shyǵysta jaǵdaıdyń shıelenisýine jáne Parsy shyǵanaǵy elderiniń qaqtyǵysqa tartylýyna, sondaı-aq Ormýz buǵazynyń bloktalýyna alyp keldi.

Iran, AQSh jáne olardyń odaqtastary 2026 jylǵy 8 sáýirge qaraǵan túni atysty toqtatý týraly kelisimge kelgen, ol 21–22 sáýir túni aıaqtaldy.

Taraptar Pákistanda qaqtyǵysty retteý boıynsha kelissózder ótkizgen. Alaıda 11–12 sáýirde ótken alǵashqy raýnd naqty nátıje bermedi. 

Ormýz buǵazy aınalasyndaǵy jaǵdaı áli de belgisiz kúıde qalyp otyr: ony jabý jahandyq energetıkalyq daǵdarysty týdyrǵan. Taraptar ony ártúrli ýaqytta ashylǵanyn málimdegenimen, is júzinde aımaqtaǵy keme qatynasy toqtap qalǵan.

Endi Eýropalyq Odaq Ormýz buǵazyndaǵy jaǵdaıǵa baılanysty Iranǵa qarsy sanktsııalar engizýdi josparlap otyr.