Iran AQSh-pen janama kelissózder júrgizýge daıyn – Hameneı keńesshisi

ASTANA. KAZINFORM – Tegeran amerıkalyq tarapty tyńdap, óz sharttaryn qoıyp, tıisti sheshim qabyldaýdy josparlap otyr, dep habarlaıdy Kazinform agenttiginiń menshikti tilshisi.

Иран АҚШ-пен жанама келіссөздер жүргізуге дайын – Хаменеи кеңесшісі
Фото: ISNA

Irannyń Joǵarǵy kóshbasshysynyń keńesshisi Kamal Harrazı beısenbi kúni Tegeran AQSh-pen daýlardy retteý úshin barlyq esikti jappaǵanyn jáne Vashıngtonmen janama kelissózder júrgizýge daıyn ekenin málimdedi. Bul týraly ırandyq ISNA agenttigi habarlady.

— Islam Respýblıkasy barlyq esikti japqan joq. Ol AQSh-pen janama kelissózder júrgizýge daıyn, basqa tarapty baǵalap, óz sharttaryn qoıyp, tıisti sheshim qabyldaýǵa nıetti, — dedi Harrazı.

Harrazı – Halyqaralyq qatynastar jónindegi strategııalyq keńestiń basshysy jáne Irannyń burynǵy syrtqy ister mınıstri (1997–2005).

Ol AQSh sheneýnikteriniń birde «soǵys», birde «kelissózder» týraly qarama-qaıshy sıgnaldar jiberip otyrǵanyn aıtty.

— Búginde biz AQSh sheneýnikteriniń áreketinen psıhologııalyq soǵysty nemese «ne soǵys, ne kelissózder» saıasatynyń shabytyn baıqap otyrmyz, — dep atap ótti Harrazı.

Osy aıda AQSh prezıdenti Donald Tramp Irannyń Joǵarǵy kóshbasshysy Álı Hameneıge ıadrolyq kelissózder júrgizý týraly talap qoıylǵan hat jiberdi. Bul hatta kelissózder týraly usynys pen eger Iran bastamadan bas tartyp, ıadrolyq baǵdarlamasyn jalǵastyrsa, saldary bolatyny týraly eskertý qatar berildi.

Tramp hatynda Iranǵa jańa kelisim jasaý úshin eki aı merzim belgiledi.

Tegerannyń resmı ustanymy osy ýaqytqa deıin AQSh-tyń «maksımaldy qysym» saıasaty jalǵasyp jatqanda, Tramp ákimshiligimen yntymaqtastyq jasamaý boldy. Bul saıasat Iran Islam Respýblıkasyna qatań sanktsııalar salýdy kózdeıdi.

Hameneı Tramptyń haty men kelissózder týraly usynysyn «Irandy kelissózderden bas tartatyn etip kórsetýge baǵyttalǵan aldaý» dep atady. Degenmen, birneshe saǵattan keıin Irannyń BUU-daǵy mıssııasy X (burynǵy Twitter) áleýmettik jelisinde Irannyń ıadrolyq baǵdarlamasy boıynsha kelissózderdi joqqa shyǵarmaıtyn málimdeme jarııalady.

14 naýryzda Iran, Reseı jáne Qytaıdyń qatysýymen ırandyq ıadrolyq baǵdarlama boıynsha kelissózder Beıjińde ótti.

Сейчас читают