Iran: AQSh-pen ıadrolyq kelissózderge qatysty ustanym ózgerissiz qalady

ASTANA. KAZINFORM – Tegeran AQSh-pen ıadrolyq kelissózder keshiktirilse de, dıplomatııaǵa adaldyǵyn bildirdi, dep habarlaıdy Kazinform agenttiginiń menshikti tilshisi.

Iran Amerıka Qurama Shtattarymen qarym-qatynasta dıplomatııalyq joldy ustanatynyn dúısenbi kúni Islam Respýblıkasynyń úkimeti málimdedi.

— Biz dıalog pen dıplomatııa jolyn jalǵastyrýǵa daıyn ekenimizdi málimdedik jáne birneshe kelissózderge qatysý arqyly bul daıyndyǵymyzdy kórsettik, — dedi Iran Syrtqy ister mınıstrliginiń resmı ókili Esmaıl Bagaı.

Onyń aıtýynsha, Tegeran ýaqyt boıynsha «ıkemdi» dedi ol jáne Oman deldalynan AQSh-pen keńesýdiń kelesi raýndy úshin yqtımal jańa kún týraly egjeı-tegjeıli málimet berýin kútip otyr.

3 mamyrǵa josparlanǵan ıadrolyq baǵdarlama boıynsha tórtinshi kelissóz raýndy «logıstıkalyq sebepterge» baılanysty keıinge shegerilgen bolatyn. Keıin Iran syrtqy ister mınıstri Abbas Aragchı AQSh-ty «maksımalıstik talaptary» úshin kelissózderdi buzdy dep aıyptady.

Óz kezeginde AQSh prezıdenti Donald Tramp Irannan munaı satyp alatyndardyń barlyǵyna sanktsııa salatynyn eskertti.

— Biz úshin amerıkalyq kelissóz júrgizýshiler tobynyń minez-qulqy men ustanymdary mańyzdy, — dep atap ótti Bagaı.

 Ol sondaı-aq AQSh sheneýnikteriniń qaıshylyqty málimdemeleri «ilgerileýge yqpal etpeıtinin», Tegerannyń óz aýmaǵynda ýran baıytý quqyǵyn qosa alǵanda, negizgi ustanymdaryn qorǵaýdaǵy tabandylyǵyna áser etpeıtinin aıtty.

Beısenbi kúni AQSh memlekettik hatshysy Marko Rýbıo Iran ıadrolyq baǵdarlamasyna qajetti baıytylǵan ýrandy óz betimen óndirmeı, ony syrttan ımporttaýy tıis ekenin málimdedi.

AQSh prezıdenti Donald Tramp buǵan deıin 2015 jylǵy Iran men álemdik derjavalar arasyndaǵy (SVPD) kelisimnen elin shyǵaryp alǵan edi. Ol ıadrolyq baǵdarlama boıynsha jańa kelisimge qol jetkizilmese, Iranǵa qarsy soqqy jasalýy múmkin ekenin eskertti. Batys elderi Irannyń ıadrolyq baǵdarlamasy ıadrolyq qarý jasaýǵa baǵyttalǵan dep sanaıdy.

Al Tegeran óz ıadrolyq baǵdarlamasynyń tek beıbit maqsatta ekenin málimdep otyr.

— Eger AQSh shynymen Iran Islam Respýblıkasynyń ıadrolyq qarýǵa ıe bolmaýyn qalasa, kóptegen másele áldeqashan sheshilgen bolar edi, — dedi Bagaı dúısenbi kúni.

Sondaı-aq Bagaı Iran Ulybrıtanııa, Frantsııa jáne Germanııamen 2 mamyrda Italııada ótýi tıis bolǵan kelissóz raýndyn keıinge qaldyrýǵa daıyn ekenin aıtty.

Sonymen qatar Tegeran Nıý-Delı men Islamabad arasyndaǵy daǵdarysty retteýdi usyndy.