Iran AQSh-pen soǵysty toqtatýdyń sharttaryn atady

Islam revolıýtsııasy saqshylar korpýsynyń resmı ókili, brıgada generaly Hoseın Mohebbıdiń aıtýynsha, Vashıngton eń aldymen áskerı is-qımyldardy tolyq toqtatyp, Tegeranǵa qarsy jańa qoqan-loqydan bas tartýy kerek.

Iran tarapy qoıǵan talaptardyń qatarynda Izraıl áskerin Lıvannan shyǵarý, Iemen blokadasyn toqtatý, Irannyń 24 mlrd dollar kólemindegi buǵattalǵan aktıvterin bosatý, sondaı-aq eldiń ıadrolyq jáne zymyran baǵdarlamalaryna aralaspaý bar.

– Eger qarsylas qazirgi jaǵdaıdy toqtatqysy kelse, soǵysty tolyq toqtatyp, qaıtalama qoqan-loqydan bas tartýy kerek. Osy sharttardyń oryndalýy aımaqtaǵy turaqtylyqty qalpyna keltirýge jáne Ormýz buǵazyn ashýǵa múmkindik beredi. Eger qarsylas elimizdegi eki nemese úsh nysanǵa soqqy jasasa, Iran kúshteri onyń 20 nysanyna jaýap soqqysyn bere alady, – dedi Hoseın Mohebbı.

Onyń málimetinshe, soǵys bastalǵanǵa deıin Ormýz buǵazy arqyly táýligine shamamen 15 mln barrel munaı jáne 5 mln barrel munaı ónimderi tasymaldanǵan. Qazir bul kólem aıtarlyqtaı tómendep, jahandyq jetkizý tizbekterine qaýip tóndirip otyr.

Mohebbıdiń málimdemesi Tegeran men Vashıngton arasynda qaqtyǵysty aıaqtaýdyń merzimi men sharttaryna qatysty kelispeýshilikter saqtalyp otyrǵan tusta jasaldy.

AQSh Prezıdenti Donald Tramp buǵan deıin soǵys 3 qarashaǵa belgilengen Kongreske aralyq saılaýdan keıin birden aıaqtalýy múmkin ekenin aıtqan. Onyń pikirinshe, Tegeran daýys berý barysyna yqpal etýge tyrysyp otyr jáne AQSh-tyń ekonomıkalyq qysymyna uzaq ýaqyt tótep bere almaıdy.

Alaıda The Wall Street Journal amerıkalyq sheneýnikterge silteme jasap, AQSh vıtse-prezıdenti Djeı Dı Vens, memlekettik hatshy Marko Rýbıo jáne basqa da keńesshiler Trampqa qaqtyǵystyń onyń prezıdenttik merziminiń sońyna deıin sozylýy múmkin ekenin eskertkenin jazdy.

Olardyń baǵalaýynsha, Iran Vashıngtonnyń ekonomıkalyq jáne áskerı qysymyna qarsy turýyn jalǵastyra alady.

Buǵan deıin AQSh Irannyń munaı flotyna jańa soqqylar jasalýy múmkin ekenin eskertken edi.