Iran AQSh-pen Ormýz buǵazy boıynsha kelisim jasalǵany týraly aqparatty joqqa shyǵardy
ASTANA. KAZINFORM – Iran bıligi AQSh-pen Ormýz buǵazyn keme qatynasyna ashý jóninde kelisimge kelgeni týraly aqparatty joqqa shyǵardy. Tegeran buǵaz AQSh-tyń «dushpandyq áreketteri» toqtaǵanǵa deıin jabyq kúıinde qalatynyn málimdedi, dep habarlaıdy Anadoly.
Fars agenttiginiń Irannyń kelissózder tobyna jaqyn derekkózge silteme jasap habarlaýynsha, Iran men AQSh arasynda Ormýz buǵazyn kemelerdiń ótýine ashý týraly qandaı da bir kelisim jasalǵan joq.
Derekkózdiń aıtýynsha, buǵan deıin taraǵan mundaı aqparat shyndyqqa janaspaıdy.
Al Islam Respýblıkasynyń áskerı qurylymdaryndaǵy taǵy bir derekkóz Ormýz buǵazy AQSh Iranǵa qatysty «dushpandyq áreketterin» toqtatpaıynsha jabyq bolatynyn málimdedi.
Onyń aıtýynsha, kemelerdiń buǵaz arqyly júrýine tek resmı jarııalanǵan baǵyt boıynsha jáne Islam revolıýtsııasy saqshylar korpýsynyń (KSIR) Áskerı-teńiz kúshteriniń ruqsatymen ǵana múmkindik beriledi.
Buǵan deıin Iran Omannyń Ormýz buǵazyn birlesip basqarý jónindegi usynysyn qabyldamaǵany habarlanǵan bolatyn.
