Iran AQSh-pen kelissózge de, jańa qaqtyǵysqa da daıyn — Iran SІM basshysy
ASTANA. KAZINFORM — Iran AQSh-pen kelissózderdi qaıta bastaýǵa daıyn, biraq jańa áskerı qaqtyǵys qaýpin de joqqa shyǵarmaıdy. Tegeran sondaı-aq Ormýz buǵazyn qandaı jaǵdaıda ashýǵa daıyn ekenin aıtty, dep habarlaıdy IRNA.
Bul týraly Irannyń Syrtqy ister mınıstri Abbas Arakchı amerıkalyq NBC telearnasyna bergen suhbatynda málimdegen.
Onyń aıtýynsha, Vashıngtonnyń jańa soqqy jasaý týraly qoqan-loqqysy Tegerannyń ustanymynan bas tartýyna sebep bolmaıdy. Mınıstr Iran jańa áskerı teketireske daıyn ekenin jáne kez kelgen jańa agressııaǵa jaýap beretinin aıtty.
Sonymen qatar dıplomat kelissózderge jol ashyq ekenin atap ótti. Onyń sózinshe, budan arǵy áreketter týraly sheshim AQSh prezıdenti Donald Trampqa baılanysty.
Ormýz buǵazyn ashýdyń sharty
Arakchı Tegerannyń Ormýz buǵazyn keme qatynasy úshin qandaı jaǵdaıda ashýǵa daıyn ekenin de aıtty.
Iran buǵattalǵan aktıvterin bosatýdy jáne munaıyn erkin satý múmkindigin berýdi talap etedi. Syrtqy ister mınıstri Tegeran bul talaptardy óziniń zańdy quqyqtaryn qorǵaý dep sanaıtynyn jáne olardy buǵan deıin jasalǵan kelisimdermen baılanystyratynyn atap ótti.
Kelissózder sanktsııalar men qarjy máselelerindegi kelispeýshilikterge baılanysty tyǵyryqqa tireldi me degen suraqqa Arakchı Iran óz aqshasyn qaıtarýdy talap etip otyrǵanyn aıtty.
— Bul — bizdiń óz qarjymyz, basqa bireýdiń qarajaty emes. Iran tek óz múlkin qaıtarýdy talap etip otyr, — dedi mınıstr.
Iran ýran baıytý týraly ne dedi
Suhbat barysynda Irannyń ıadrolyq baǵdarlamasy men 60 paıyzǵa deıin baıytylǵan ýran qory da sóz boldy.
Arakchı halyqaralyq mindettemelerdi buzdy degen aıyptaýlardy joqqa shyǵardy. Onyń aıtýynsha, ýrandy 60 paıyzǵa deıin baıytý zańsyz emes jáne eldiń ıadrolyq qyzmeti ıAdrolyq qarýdy taratpaý týraly shartqa sáıkes júrgizilip jatyr.
Irannyń SІM basshysy Tegeran óziniń ıadrolyq baǵdarlamasyn beıbit maqsattaǵy baǵdarlama dep sanaıtynyn taǵy da atap ótti.
Osyǵan deıin AQSh pen Iran arasyndaǵy kelissóz 28 qyrkúıekte ótetini týraly habarlandy.
