Iran AQSh-pen kelissózdi jalǵastyrý úshin shart qoıdy
ASTANA. KAZINFORM — Irannyń syrtqy ister mınıstri Abbas Arakchı aldaǵy kúnderi AQSh-pen ózara túsinistik týraly memorandýmǵa tsıfrlyq túrde qol qoıylýy múmkin ekenin málimdedi, dep habarlaıdy Anadolu.
Irannyń memlekettik teledıdarynda sóılegen sózinde syrtqy ister mınıstri kelissózdiń barysyn túsindirdi.
Onyń aıtýynsha, qujatqa aldaǵy birneshe kún ishinde qashyqtan qol qoıylýy múmkin. Bul rette Arakchı memorandýmnyń erejeleri tájirıbede oryndalmaǵan jaǵdaıda túpkilikti kelisim boıynsha kelissóz júrgizilmeıtinin atap ótti.
Irannyń syrtqy ister mınıstri sondaı-aq 60%-ǵa deıin baıytylǵan ýran máselesin de qozǵady. Onyń málimdeýinshe. Tegeran bul taqyrypty retteýdiń jalǵyz ádisi retinde Iran aýmaǵynda qunarsyzdandyrý dep sanaıdy.
Budan basqa, Arakchıdiń aıtýynsha, memorandým jobasynda Ormýz buǵazy jáne AQSh engizgen áskerı-teńiz blokadasyn alyp tastaý týraly erejeler bar.
Mınıstr Ormýz buǵazyn basqarý burynǵy rejımnen ózgeshe bolatynyn atap ótti.
Ol buǵazdyń Oman men Irannyń egemendiginde ekenin eske túsirip, bul másele boıynsha Omanmen oń pikirtalas bolǵanyn habarlady.
Arakchı sondaı-aq yqtımal kelisim aıasynda Irannyń toqtap turǵan aktıvterge qol jetkizý mehanızmi qarastyrylatynyn málimdedi.
Bul rette Iran SІM basshysy BAQ-ta paıda bolǵan kelisim mátinderin rastamaıtynyn atap ótti.
— Eger memorandýmnyń erejeleri oryndalmasa, túpkilikti kelisim boıynsha kelissóz júrgizilmeıdi, — dep málimdedi ol.
Beısenbi kúni keshke AQSh prezıdenti Donald Tramp Iranǵa qarsy shabýyldaryn toqtatyp, Tegeranmen kelisimge qol qoıýǵa jaqyn ekenin málimdedi. Osydan keıin birneshe BAQ bir ýaqytta eki el arasyndaǵy aldaǵy «ózara túsinistik týraly memorandým» týraly jańa málimetter jarııalady.
