Iran AQSh-pen kelissóz júrgizbeıdi

ASTANA. KAZINFORM — Irannyń qaýipsizdik basshysy eldiń AQSh-pen «kelissózder júrgizbeıtinin» málimdedi jáne Donald Trampty Izraıl múddesin bárinen joǵary qoıdy dep aıyptady. Bul týraly Kazinform agenttiginiń Vashıngtondaǵy tilshisi habarlady.

Irannyń Joǵarǵy Ulttyq qaýipsizdik keńesiniń hatshysy Álı Larıdjanı jeksenbi kúni AQSh prezıdenti Donald Trampty óziniń «Birinshi orynda Amerıka» uranyn «Birinshi orynda Izraıl» uranyna aınaldyrdy dep aıyptap, Tegeran AQSh úkimetimen kelissózder júrgizbeıtinin málimdedi, dep habarlaıdy FOX News.

Ol sondaı-aq AQSh BAQ-tarynyń Irannyń Vashıngtonmen ıadrolyq kelissózderdi qaıta bastaýǵa tyrysyp jatqany týraly málimdemelerin joqqa shyǵardy, dep habarlaıdy Khaama.

— Biz AQSh-pen kelissóz júrgizbeımiz, — dedi Álı Larıdjanı áleýmettik jelide.

Jeksenbi kúni Irannyń qaýipsizdik basshysy Tegeran Taıaý Shyǵystyń basqa elderine shabýyl jasaǵysy kelmeıtinin, biraq aımaqtaǵy AQSh áskerı bazalary Iranǵa shabýyl jasaý úshin paıdalanylǵan kezde jaýap berýi kerek ekenin málimdedi.

— Aımaq elderine: bizdiń sizderge shabýyl jasaý nıetimiz joq. Biraq sizdiń aýmaǵyńyzda ornalasqan bazalar bizge qarsy paıdalanylsa, eger AQSh osy kúshterge súıene otyryp, aımaqta operatsııa júrgizse, biz bul bazalarǵa soqqy beremiz. Óıtkeni bul bazalar bul elder aýmaǵynyń bóligi emes, Amerıka jeriniń bóligi, — dep jazdy Álı Larıdjanı.

Buǵan deıin AQSh prezıdenti Donald Tramp Irannyń jańa basshylyǵynan kelissóz júrgizý týraly usynys alǵany habarlanǵan bolatyn.