Iran AQSh pen Izraıldiń bankteri men ekonomıkalyq nysandaryna soqqy jasaýy múmkin
ASTANA. KAZINFORM — Tegeran aımaqtaǵy qaqtyǵys aıasynda nysandar tizimin keńeıtý múmkindigin habarlap, AQSh pen Izraılge qatysty ekonomıkalyq ınfraqurylymǵa qaýip tónetinin eskertti, dep habarlaıdy Kazinform menshikti tilshisi.
Irannyń «Hatam Ál Anbııa» birikken komandalyq shtabynyń ókili Ibrahım Zolfakarı sársenbi kúni Tegeran AQSh pen Izraılge baılanysty ekonomıkalyq ortalyqtar men bank qurylymdaryna soqqy berýi múmkin ekenin málimdedi. Bul týraly Irannyń resmı BAQ-tary habarlady.
Onyń aıtýynsha, mundaı sheshim Iran bankteriniń birine jasalǵan shabýyldan keıin qarastyrylyp otyr, ony ırandyq tarap AQSh pen Izraıldiń áreketterimen baılanystyrady.
Spokesman for the Khatam al-Anbiya Central Headquarters: Last night, the terrorist American army and the brutal Zionist regime, after failing to achieve military objectives, targeted one of the country's banks.
— IRNA News Agency ☫ (@IrnaEnglish) March 11, 2026
— Óz naýqanyn sátsiz aıaqtaǵan AQSh armııasy men qatal sıonıstik rejım elimizdiń bir bankin nysanaǵa aldy. Bul zańsyz ári buryn sońdy bolmaǵan áreket arqyly dushpan bizdi aımaqtaǵy AQSh pen sıonıstik rejımge qatysty ekonomıkalyq ortalyqtar men bankterge soqqy berýge májbúr etýde, — dedi shtab ókili.
Sonymen qatar, ol aımaqtaǵy turǵyndardy bankter men uqsas nysandardan alys bolýǵa shaqyrdy.
Óz kezeginde Iran Islam revolıýtsııasy saqshylary korpýsyna baılanysty Tasnim agenttigi Izraılmen baılanysy bar jáne áskerı maqsatta qoldanylǵan tehnologııasy bar AQSh kompanııalarynyń keńseleri men ınfraqurylym obektileriniń tizimin jarııalap, olardy «Irannyń jańa nysandary» dep atady.
— Aımaqtyq soǵys ınfraqurylymǵa deıin keńeıgen saıyn, Iran úshin zańdy nysandardyń sheńberi de ulǵaıady, — delingen málimdemede.
Tizimge Google, Microsoft, Palantir, IBM, Nvidia jáne Oracle kompanııalaryna baılanysty nysandar kirdi, olar Izraıldiń birneshe qalasynda jáne Parsy shyǵanaǵy elderinde ornalasqan.
Buǵan deıin Iran 1 300 beıbit turǵynnyń qaza tapqanyn jáne myńdaǵan nysannyń joıylǵanyn habarlaǵan bolatyn.