Iran AQSh pen Izraıl jasaǵan soqqylardan keıin kelissózder júrgizýdi surady — Tramp

ASTANA. KAZINFORM — AQSh prezıdenti Donald Tramp AQSh pen Izraıl Irannyń áskerı jáne saıası ınfraqurylymyna soqqy jasaǵannan keıin Irannyń jańa basshylyǵy kelissózder júrgizýdi usynǵanyn málimdedi, dep habarlaıdy Kazinform agenttigi.

Onyń aıtýynsha, soqqylar saldarynan Irannyń joǵarǵy kóshbasshysy aıatolla Álı Hameneı jáne birqatar joǵary laýazymdy sheneýnik qaza tapqan.

— Olar kelissóz júrgizgisi keledi, men buǵan kelistim, — dedi Tramp The Atlantic jýrnalyna bergen suhbatynda.

Sondaı-aq, ol Iran mundaı qadamǵa buǵan deıin de bara alar edi dep atap ótti. Tramp kelissózderdiń naqty qashan bastalatynyn naqtylamady, biraq aldyńǵy kelissózderge qatysqan keıbir ırandyq resmı tulǵalardyń soqqylar kezinde qaza tapqanyn aıtty.

— Bul adamdardyń kópshiligi qaza boldy. Olar buǵan deıin kelisimge kelýi kerek edi. Mámile jasaı alar edi. Alaıda olar tym aılakerlik tanytty, — dedi Tramp.

Ol AQSh áreketteri qaýipsizdikti qamtamasyz etýge jáne halyqty qorǵaýǵa baǵyttalǵanyn basa aıtty. Operatsııalar nátıjesinde Irannyń 48 jetekshisi qaza tapqan jáne amerıkalyq áskerılerdiń áreketi «jospardan ozyq» júzege asyrylyp jatqanyn jetkizdi.

Buǵan deıin Tramp Iranǵa qarsy áskerı operatsııa qoıylǵan mindetter tolyq oryndalǵanǵa deıin jalǵasatynyn málimdegen bolatyn.

Eske sala keteıik, aqpan aıynyń sońynda AQSh Iran nysandaryna qarsy «Epıkalyq qahar» operatsııasyn júrgizdi. Jaýap retinde Iran Izraılge jáne Taıaý Shyǵystaǵy amerıkalyq áskerı nysandarǵa soqqy jasady, al Dýbaı men Abý-Dabı qalalarynda kúshti jarylystar boldy.

Irannyń joǵarǵy kóshbasshysy Álı Hameneı qaza tapqany belgili boldy — onyń rezıdentsııasyna 30 bomba tastalǵan. Iran derekkózderiniń málimetinshe, soqqylar saldarynan elde 200-den astam adam qaza taýyp, 700-den astamy jaralanǵan. Shabýyldar Irannyń 14 provıntsııasyn qamtydy.

Sonymen qatar, Dýbaı áýejaıyna da soqqy jasaldy. Iran aýmaǵynda júrgen qazaqstandyqtar úshin Qazaqstan Respýblıkasynyń Elshiligi shuǵyl baılanys tártibi men elden shyǵý múmkindikterin túsindirdi.