Iran AQSh pen Izraıl shabýyldarynan kelgen shyǵyndy $270 mlrd dep baǵalady
ASTANA. KAZINFORM – Iran bıligi AQSh pen Izraıldiń shabýyldarynan kelgen shyǵyn kólemin aldyn ala 270 mlrd dollar dep baǵalap, tolyq ótemaqy talap etý nıetin málimdedi, dep habarlaıdy Anadolu Ajansı.
Iran úkimetiniń resmı ókili Fateme Mohadjeranıdiń aıtýynsha, bul ázirge aldyn ala esep. Naqty soma birneshe kezeńnen turatyn arnaıy baǵalaý rásiminen keıin jarııalanady. Onyń sózinshe, áskerı reparatsııalar máselesi Iran delegatsııasy tarapynan birneshe kelissózde, sonyń ishinde Islamabadtaǵy kezdesýlerde kóterilgen.
Sondaı-aq Irannyń BUU janyndaǵy turaqty ókili Amır Saıd Iravanı AQSh pen Izraıl operatsııalaryna óz aýmaǵyn paıdalanýǵa múmkindik berdi dep esepteletin birqatar óńir elderinen de ótemaqy talap etiletinin málimdedi. Áńgime Bahreın, Saýd Arabııasy, Qatar, Birikken Arab Ámirlikteri jáne Iordanııa týraly bolyp otyr.
Tegerannyń málimdeýinshe, shabýyldar saldarynan ónerkásip nysandary, ınfraqurylym jáne energetıka sektoryna eleýli zalal kelgen. Qazir búlingen nysandardy túgendeý jáne bıýdjet kirisindegi shyǵyndardy esepteý jumystary jalǵasyp jatyr.
Eske sala ketsek, Iran AQSh-tyń blokadasyna jaýap retinde Qyzyl teńizdi jabýǵa nıetti ekenin aıtty.
Al Pákistan delegatsııasy AQSh-pen kelissózderdi jalǵastyrý úshin Iranǵa keldi.
