Iran AQSh pen Izraıl nysandaryna jańa soqqylar jasaǵanyn málimdedi
ASTANA. KAZINFORM – Iran AQSh pen Izraılge tıesili birqatar nysanǵa jańa zymyran soqqylaryn jasaǵanyn málimdedi, dep habarlaıdy Anadolý.
Agenttiktiń jazýynsha, Islam revolıýtsııasy saqshylary korpýsy AQSh armııasyna tıesili HIMARS artıllerııalyq júıelerine soqqy jasalǵanyn habarlaǵan. Bul júıeler Kýveıt aýmaǵyndaǵy Býbııan aralynda ornalasqan.
Sonymen qatar, Bahreın soltústiginde ornalastyrylǵan Patriot áýe qorǵanys júıeleri jáne Birikken Arab Ámirlikteri aýmaǵyndaǵy amerıkalyq áskerı qyzmetkerler shoǵyrlanǵan oryndarǵa da soqqy berilgeni aıtyldy.
KSIR málimetinshe, bul áreketter «Berik ýáde 4» operatsııasynyń 95-tolqyny aıasynda júzege asqan. Sonymen qatar Izraıl aýmaǵyndaǵy birqatar nysandarǵa da soqqy jasalǵan.
Atap aıtqanda, Tel-Avıv, Bneı-Brak, Petah-Tıkva, Ramat-Gan jáne Kırıat-Shımona qalalaryndaǵy nysandar «kóp qýatty zymyrandarmen qarqyndy túrde atqylandy» dep málimdelgen.
Sondaı-aq, Oracle kompanııasynyń BAÁ-degi ortalyǵy, Izraılmen baılanysty keme jáne Bahreındegi Halıfa bın Salman porty da nysanaǵa alynǵany habarlandy.
Buǵan deıin Iran aýmaǵynda amerıkalyq áskerı ushaqtyń atyp túsirilgeni týraly aqparat taraǵan bolatyn.
