Iran AQSh-qa soǵysty toqtatýdyń jeti kúndik josparyn usyndy
ASTANA. KAZINFORM – Iran Vashıngtonǵa AQSh-pen qaqtyǵysty toqtatý, Ormýz buǵazyn qaıta ashý jáne ıadrolyq baǵdarlama boıynsha kelissózderdi jalǵastyrýdy kózdeıtin jeti kúndik josparyn usyndy, dep habarlaıdy Anadolu.
Iran Syrtqy ister mınıstri Abbas Arakchı BUU Bas Assambleıasynyń 81-sessııasy aıasyndaǵy baspasóz máslıhatynda Tegeran basshylyǵynyń Vashıngtonǵa jeti kúndik jospar usynǵanyn málimdedi.
Arakchıdiń aıtýynsha, usynys AQSh pen Iran arasynda maýsym aıynda qol jetkizilgen, alaıda keıin júzege aspaı qalǵan ózara túsinistik týraly kelisimdegi mindettemelerge uqsas. Vashıngton usynysty qabyldaǵan jaǵdaıda Tegeran ony dereý júzege asyrýǵa daıyn ekenin bildirgen.
– Biz deldaldar arqyly AQSh-qa jospar usyndyq. Onda belgili bir talaptar oryndalǵan jaǵdaıda jetinshi kúnniń sońynda Ormýz buǵazy ashylyp, kelissózder qaıta bastalatyny qarastyrylǵan, – dedi Abbas Arakchı.
Jospar talaptarynyń qatarynda jeti kún ishinde barlyq baǵyttaǵy, sonyń ishinde Lıvandaǵy áskerı is-qımyldardy toqtatý bar. Sondaı-aq Iran AQSh-tan buǵattalǵan qarjy aktıvterin bosatýdy, Iran munaıyna qatysty sanktsııalardy alyp tastaýdy jáne teńiz blokadasyn toqtatýdy talap etip otyr.
Usynysta buǵattalǵan Iran qarajatynyń kólemi keminde 12 mlrd dollar ekeni aıtylǵan. Osy talaptar oryndalǵannan keıin Ormýz buǵazyn qaıta ashyp, ıadrolyq baǵdarlama boıynsha kelissózderdi dereý bastaý kózdelgen.
Kelissózder barysynan habardar amerıkalyq sheneýniktiń aıtýynsha, Vashıngton deldaldar arqyly «oń ári konstrýktıvti» kelissózder júrgizip jatyr. Degenmen AQSh ákimshiligi kelisimge kelýge asyqpaıtynyn bildirgen.
Arakchı kelisimge AQSh-taǵy aralyq saılaýǵa deıin qol jetkizilgeni durys bolatynyn da aıtty.
Buǵan deıin Iran tarapy Qatardyń araaǵaıyndyǵymen AQSh-qa óz talaptaryn jetkizgen bolatyn. Olardyń arasynda barlyq baǵyttaǵy soǵysty toqtatý, AQSh-tyń áskerı áreketteri men teńiz blokadasyn doǵarý jáne Iran aktıvterin bosatý talaptary bar.
Iran Syrtqy ister mınıstri Nıý-Iorktegi kelissózderin 28 qyrkúıekke deıin jalǵastyrady.
