Iran 2026 jylǵy Qysqy Paralımpıada oıyndaryna qatyspaıdy
ASTANA. KAZINFORM — Halyqaralyq paralımpıadalyq komıtet (IPC) Iran 2026 jyly Mılan-Kortınada ótetin Qysqy Paralımpıada oıyndaryna jol júrý shekteýlerine baılanysty qatyspaıtynyn málimdedi, dep habarlaıdy Anadolý agenttigi.
IPC taratqan málimdemege sáıkes, 2026 jyldyń 6–15 naýryzy aralyǵynda Mılan-Kortına qalalarynda Qysqy Paralımpıada oıyndary ótedi. Alaıda óz eliniń atynan qatysýǵa daıyndalyp jatqan jalǵyz ırandyq sportshy — shańǵy jarysynyń kross sportshysy Abýlfazl Hatıbı Mıanaı Taıaý Shyǵysta bolyp jatqan qaqtyǵys saldarynan Italııaǵa qaýipsiz túrde bara almaıdy. Osyǵan baılanysty ırandyq sportshy jarysqa qatysýdan bas tartýǵa májbúr boldy.
Halyqaralyq paralımpıadalyq komıtettiń prezıdenti Endrıý Parsons Abýlfazl Hatıbı Mıanaıdyń oıyndarǵa qatysa almaýy álemdik sport úshin de, ırandyq sportshynyń ózi úshin de úlken ókinish ekenin aıtty.
– Qaqtyǵys bastalǵan senbiden bastap IPC jáne «Mılano-Kortına 2026» uıymdastyrý komıteti ırandyq delegatsııanyń oıyndarǵa qaýipsiz jetýin qamtamasyz etý úshin balama baǵyttardy tabýǵa tynymsyz jumys istedi. Alaıda Taıaý Shyǵystaǵy qaqtyǵystardyń jalǵasýyna baılanysty adamdardyń ómirine tónetin qaýip tym joǵary, — dep atap ótti IPC prezıdenti.
Eske sala ketsek, Taıaý Shyǵystaǵy jaǵdaı Azıada-2026 oıyndarynyń qaýipsizdigine áser etýi múmkin ekenin jazdyq.
Al Air Astana Taıaý Shyǵys baǵytyndaǵy reısterdi toqtatý merzimin uzartyp, áýe qatynasy 10 naýryzǵa deıin toqtatyldy.