Iran 2026 jylǵy fýtboldan álem chempıonatynyń jerebesine qarsylyq tanytty
ASTANA. KAZINFORM — Islam Respýblıkasy kelesi aptada Vashıngtonda ótetin fýtboldan álem chempıonatynyń fınaldyq kezeńiniń jerebesine qarsylyq tanytty. Buǵan AQSh-tyń ırandyq delegatsııanyń birneshe múshesine vıza berýden bas tartýy sebep boldy, dep habarlaıdy France 24.
Tasnim News Agency dereginshe, AQSh 5 jeltoqsanda ótetin jerebege qatysýy tıis bolǵan ırandyq delegatsııanyń tek tórt múshesine ǵana vıza bergen. Vıza berilmegenderdiń qatarynda Iran fýtbol federatsııasynyń prezıdenti Mehdı Tadj da bar.
— Biz FIFA-ǵa qabyldanǵan sheshimderdiń sporttyq qaǵıdattarǵa esh qatysy joq ekenin habarladyq. Sondyqtan ırandyq delegatsııa músheleri álem chempıonatynyń jerebesine qatyspaıdy, — dep keltiredi France 24 Iran fýtbol federatsııasy baspasóz hatshysynyń sózin.
Frantsýz basylymynyń habarlaýynsha, federatsııa basshysy Mehdı Tadj FIFA prezıdenti Djannı Infantınoǵa bul sheshimniń saıası sıpatta ekenin aıtyp, AQSh mundaı áreketten bas tartýy tıis ekenin jetkizgen.
2026 jylǵy fýtboldan álem chempıonaty alǵash ret jańa formatta ótedi. Fınaldyq kezeńge 48 komanda qatysady. Jarys AQSh, Kanada jáne Meksıka aýmaǵynda ótedi.
Iran ulttyq quramasy Azııa fýtbol konfederatsııasynyń irikteý týrnırindegi kórsetkishiniń nátıjesinde 2026 jylǵy álem chempıonatynyń fınalyna joldama aldy.
Islam Respýblıkasy quramasy álem chempıonatynyń fınaldyq kezeńine qatarynan tórtinshi ret jáne tarıhynda jetinshi ret qatyspaq.
Buǵan deıin Tramp ákimshiligi AQSh vızasyn rásimdeý protsesin fýtbol jankúıerleri úshin jyldamdatýǵa arnalǵan FIFA Pass baǵdarlamasyn tanystyrǵan bolatyn.