Iran 2026 jylǵy álem chempıonatyn AQSh-ta ótkizedi — FIFA prezıdenti
ASTANA. KAZINFORM — FIFA prezıdenti Djannı Infantıno Iran ulttyq quramasy jerebe tartý sharty boıynsha 2026 jylǵy álem chempıonatyna qatysyp, matchtaryn AQSh-ta ótkizetinin málimdedi, dep habarlaıdy Al Jazeera.
Buǵan deıin Iran AQSh pen Izraıl arasyndaǵy qaqtyǵysqa baılanysty oıyndardy Meksıkaǵa kóshirý múmkindigin qarastyrǵan. Meksıka prezıdenti Klaýdııa Sheınbaým quramany óz aýmaǵynda qabyldaýǵa daıyn ekenin bildirdi.
— Matchtar josparlanǵan jerde ótedi, — dep atap ótti Djannı Infantıno Týrtsııada ótken Iran men Kosta-Rıka arasyndaǵy joldastyq kezdesý kezinde.
Ol sondaı-aq komandanyń «myqty ári týrnırge daıyn» ekenin aıtty.
Álem chempıonaty 11 maýsymda AQSh, Meksıka jáne Kanadada bastalady. Iran alǵashqy oıynyn 15 maýsymda Jańa Zelandııaǵa qarsy Los-Andjeleste ótkizedi, keıin Belgııamen (21 maýsym, Los-Andjeles) jáne Egıpetpen (27 maýsym, Sıetl) kezdesedi.
Irandyq fýtbolshylar jýyrda Túrkııada joldastyq matchtar ótkizip, 28 aqpanda Mınab qalasyndaǵy mektepke jasalǵan áýe soqqysy qurbandaryn eske aldy. Atalǵan shabýyl saldarynan keminde 170 adam qaza tapqan.
— FIFA geosaıası qaqtyǵystardy sheshe almaıdy, biraq biz fýtbol men álem chempıonatynyń kúshin baılanystardy nyǵaıtý jáne beıbitshilikti qoldaý úshin paıdalanýǵa bel býyp otyrmyz. Qazir bizdiń oıymyz soǵystardan zardap shegip jatqan adamdarmen birge, — dep qosty Infantıno.
Ol FIFA týrnırdi «jospar boıynsha» barlyq komandalardyń qatysýymen ótkizýdi kózdep otyrǵanyn atap ótti.
Buǵan deıin Irannyń sport jáne jastar mınıstri Ahmad Donıamalı memlekettik telearnaǵa bergen suhbatynda el fýtbolshylary AQSh-ta qaýipsiz bolmaıtynyn aıtyp, qurama fýtboldan álem chempıonatyna qatyspaıtynyn eskertken edi.
Sondaı-aq Iran áıelder fýtbol quramasynyń úsh múshesi Avstralııada bergen saıası baspana suraý ótinishterinen bas tartyp, elden ketken bolatyn.
