Iran 2021 jyly koronavırýsqa qarsy vaktsına shyǵarýdy josparlap otyr

TEGERAN. IRNA-QazAqparat – Irannyń keıbir ınnovatsııalyq kásiporyndary COVID-19 koronavırýs ınfektsııasyna qarsy vaktsınany ázirleý ústinde. Irandyq 1399 jyldyń sońyna qaraı (2021 jyldyń 21 naýryzy) onyń biri koronavırýsqa qarsy vaktsınany shyǵara bastaıdy. Bul týraly dúısenbi kúni Irannyń densaýlyq saqtaý jáne medıtsınalyq bilim mınıstrliginiń tehnologııalardy damytý bóliminiń bas dırektory Hosseın Vatanpýr málim etti, dep habarlaıdy QazAqparat IRNA agenttigine silteme jasap.

Onyń aıtýynsha, papılloma vırýsy (APV) men H1N1 qarsy vaktsınalar da bıylǵy jyldyń sońyna qaraı qoljetimdi bolady. Ol Irannyń damyǵan eldermen qatar vaktsına ázirlep jatqanyn atap ótti.

«Bizdiń bul saladaǵy jetistikterimiz halyqaralyq ónimdermen básekege túse alady», - dep qosty ol.

Eske sala ketsek, 2020 jyldyń 12 maýsymynda QR Premer-Mınıstri Asqar Mamın Jambyl oblysynda Qordaı aýdanynyń Gvardeıskıı qala úlgisindegi kentinde QR BǴM Ǵylym komıtetiniń Bıologııalyq qaýipsizdik máseleleri ǵylymı-zertteý ınstıtýty (ǴZI) janyndaǵy vaktsına shyǵaratyn bıofarmatsevtıkalyq zaýyttyń qurylysyn bastap berdi.

Jambyl oblysynyń Qordaı aýdanyndaǵy QR BǴM Ǵylym komıtetine qarasty Bıologııalyq qaýipsizdik máseleleri ǵylymı-zertteý ınstıtýty jáne «Ulttyq bıotehnologııa ortalyǵy» RMK koronavırýsqa qarsy vaktsına jasaýdy qolǵa alǵan bolatyn.

Qordaıdaǵy ınstıtýt Dúnıejúzilik densaýlyq saqtaý uıymymen, AQSh aýrýlardyń aldyn alý jáne baqylaý ortalyǵymen, Halyqaralyq Vena ýnıversıtetimen jáne basqa da bedeldi uıymdarmen tyǵyz baılanysta jumys isteıdi.

Ótken mamyr aıynyń ortasynda Qazaqstan COVID-19 vırýsyna qarsy vaktsına ázirleýshi elder qataryna resmı túrde qosylǵany jáne otandyq ǵalymdar ázirlegen vaktsına klınıkaǵa deıingi synaqtan óte bastaǵany habarlandy.