Iran 14 maýsymda AQSh-pen memorandýmǵa qol qoımaıdy
ASTANA. KAZINFORM — Iran 14 maýsymda soǵysty retteý úderisin bastaý týraly AQSh-pen birlesken memorandýmǵa qol qoımaıdy. Bul týraly Iran Syrtqy ister mınıstrliginde málimdedi, dep habarlaıdy DW.
Iran AQSh-pen soǵysty retteý úderisin bastaý jónindegi birlesken memorandýmǵa jeksenbi, 14 maýsym kúni qol qoıýdan bas tartty. Buǵan deıin mundaı múmkindikti AQSh prezıdenti Donald Tramp joqqa shyǵarmaǵan bolatyn. Bul kúni Tramptyń 80 jasqa tolǵan týǵan kúni atap ótiledi.
Bul týraly bir kún buryn Iran Syrtqy ister mınıstrliginiń resmı ókili Esmaıl Bagaı málimdedi.
– Ózara túsinistik týraly memorandýmǵa qol qoıýdyń naqty kúnine qatysty ázirge kúte turǵan jón. Bul erteń bolmaıdy, biraq kelisimniń jaqyn kúnderi jasalýy múmkin ekenin joqqa shyǵarýǵa bolmaıdy. Degenmen qarsy taraptyń turaqsyzdyǵyn eskere otyryp, bul úderiske qatysty kez kelgen málimdemede saq bolýymyz qajet, – dep keltiredi Irannyń Tasnim aqparat agenttigi Bagaıdiń sózin.
Bagaıdiń aıtýynsha, qujat áskerı is-qımyldardy toqtatýǵa negiz bolýy tıis. Alaıda bul kezeńde Irannyń ıadrolyq baǵdarlamasy máselesi talqylanbaıdy.
Buǵan deıin Irannyń Syrtqy ister mınıstri Abbas Aragchı AQSh-pen Irandaǵy áskerı is-qımyldardy toqtatý týraly kelisim jasasý jaqyn ekenin jáne onda Ormýz buǵazynyń ashylýy qarastyrylatynyn málimdegen bolatyn.
Onyń sózinshe, Irannyń ıadrolyq baǵdarlamasyna qatysty kelissózder keıinirek bastalady.
Aıta ketelik AQSh prezıdenti Donald Tramp Vashıngton men Tegeran arasyndaǵy soǵys qımyldaryn toqtatý jónindegi kelisimge qol qoıý jeksenbi kúni josparlanǵanyn málimdegen edi.
