Iran 1300 beıbit turǵynnyń qaza tapqanyn jáne myńdaǵan ǵımarattyń qıraǵanyn málimdedi
ASTANA. KAZINFORM – 28 aqpannan beri AQSh pen Izraıldiń áskerı shabýyldarynan Iranda 1 300-den astam beıbit turǵyn qaza taýyp, 9 669 turǵyn úı qırady. Bul týraly seısenbi kúni Irannyń BUU-daǵy elshisi jáne turaqty ókili Ámir Saıd Iravanı málimdedi, dep habarlaıdy Sınhýa agenttigi.
Onyń aıtýynsha, qıraǵan ǵımarattardyń qatarynda 7 943 turǵyn úı, 1 617 saýda jáne qyzmet kórsetý ortalyǵy, 32 medıtsınalyq jáne farmatsevtıkalyq nysan, 65 mektep jáne basqa da bilim berý mekemeleri, 13 Qyzyl Jarty aı ǵımaraty jáne birneshe elektrmen jabdyqtaý nysandary bar.
– Olar el boıynsha beıbit turǵyndar men azamattyq ınfraqurylymdy ádeıi jáne tańdamaı nysanaǵa alyp otyr. Bul áreketter halyqaralyq quqyqty tolyqtaı elemeýshilik, - dedi Iravanı.
Ol tyǵyz qonystanǵan turǵyn úı aýdandary men negizgi azamattyq ınfraqurylym ádeıi nysanaǵa alynyp jatqanyn atap ótti. Onyń aıtýynsha, shabýyldar jalǵasqan saıyn qaza tapqandar sany artyp keledi.
Mysal retinde Iravanı senbi kúni keshke Tegeran men basqa da qalalardaǵy munaı qoımalaryna jasalǵan kúshti soqqylardy keltirdi. Bul shabýyldar atmosferaǵa kóp mólsherde qaýipti jáne ýly zattar shyǵardy.
Onyń aıtýynsha, jarylystar aýanyń qatty lastanýyna jáne densaýlyqqa, ásirese balalar, áıelder, qarttar jáne aýrýy bar adamdar úshin aýyr qaýip tóndirgen. Ol Iran Qyzyl Jarty Aı qoǵamynyń derekterin keltirdi.
– Bul shabýyldar sonymen qatar BUU-nyń klımattyń ózgerýi týraly negizdemelik konventsııasy men Bıologııalyq ártúrlilik týraly konventsııany qosa alǵanda, halyqaralyq ekologııalyq mindettemelerdi buzady, - dedi ol.
Iravanı sonymen qatar senbi kúni tańerteń Tegerandaǵy Mehrabad áýejaıyna jasalǵan shabýyl týraly aıtty. Birneshe azamattyq ushaq pen áýejaı ınfraqurylymy qırady. Hormozgan provıntsııasyndaǵy Keshm aralyndaǵy tuşylandyrý qondyrǵysyna da soqqy berilip, 30 aýyldy sýmen qamtamasyz etý úzildi.
Onyń aıtýynsha, jeksenbi kúni tańerteń Izraıl Lıvannyń Beırýt qalasyndaǵy Ramada qonaqúıine «qasaqana terrorıstik shabýyl» jasap, tórt ırandyq dıplomat qaza tapty.
– Halyqaralyq qaýymdastyq Iran halqyna qarsy bul qandy soǵysty toqtatý úshin dereý sharalar qabyldaýy kerek. Biz halqymyzdy, aýmaǵymyzdy jáne táýelsizdigimizdi qorǵaý úshin barlyq qajetti sharany qabyldaımyz, - dedi Iravanı.
Budan buryn AQSh Iranmen qaqtyǵystyń alǵashqy kúnderinde 5,6 mıllıard dollar jumsaǵanyn jazǵan edik.