Iran 12 saǵat boıy ınternetsiz qaldy – NetBlocks

ASTANA. KAZINFORM – Beısenbi kúni keshke Iranda narazylyq aktsııalarynyń kúsheıýine baılanysty búkil el boıynsha ınternet óshirildi. El aýmaǵynda ınternetti paıdalanýshylardyń belsendiligi kem degende 12 saǵat eń tómen deńgeıde saqtalyp otyr, dep habarlaıdy Kazinform. 

Bul týraly NetBlocks halyqaralyq ınternet monıtorıngi qyzmetiniń derekteri kýálandyryp otyr.

– Naqty ýaqyt rejımindegi derekter qazirgi ýaqytta Iranda búkil el boıynsha ınternet óshirilgenin kórsetedi, - dep jazdy NetBlocks.

Juma kúni tańerteń Tegerannan reportaj júrgizgen Al Jazeera tilshisi Tohıd Asadı beısenbi kúni jergilikti ýaqyt boıynsha keshki saǵat 20:00 shamasynda myńdaǵan adamnyń kóshege shyqqanyn habarlady.

– Biz Iran astanasynyń kóptegen jańa aýdanynda adamdardyń kóshege shyqqanyn kórdik. Men qala ortalyǵynan kólikpen kele jatqanda birneshe kóshe jabyldy, - dedi Asadı.

Ol narazylyq bildirýshiler men polıtsııa arasynda qaqtyǵys bolǵanyn atap ótti.

Iran astanasynda jáne basqa da iri qalalarynda eldiń qıyn ekonomıkalyq jaǵdaıyna baılanysty 28 jeltoqsannan beri jappaı narazylyq sharalary ótip jatyr. 

Mundaı sherý aldymen Tegerannyń basty bazarynda bastaldy. Onda birneshe dúken ıeleri gıperınflıatsııa men baǵanyń kúrt aýytqýyna narazylyq bildirip, saýda núktelerin japty. Irannyń ulttyq valıýtasy rıaldyń ashyq naryqta bir AQSh dollaryna shaqqandaǵy baǵamy 1,46 mln rıaldan asyp, tarıhı eń tómengi deńgeıge jetkeni habarlandy.

Al Jazeera-nyń habarlaýynsha, Iran prezıdenti Masýd Pezeshkıan narazylyqtardy basý úshin «barynsha ustamdylyq tanytýǵa» shaqyrdy.

Irannyń rýhanı kósemi Álı Hameneı bıliktiń narazylyq tanytýshylarmen dıalogqa túsýge daıyn ekenin aıtty. Alaıda tártipsizdikterge qatysqandardy «ornyna qoıý kerek» dep eskertti. 

Óz kezeginde Joǵarǵy Sot tóraǵasy Golamhosseın Mohsenı-Edjeı janjal shyǵarýshylarǵa eshqandaı jeńildik kórsetilmeıtinin atap ótti, sonymen birge bıliktiń azamattardyń zańdy áleýmettik talaptaryn tyńdaýǵa daıyn ekenin moıyndady.

– Eger bireý tártipsizdik týdyrý nemese qaýipsizdikke qaýip tóndirý nıetimen kóshege shyqsa nemese olardy qoldasa, onda olarǵa aqtaý joq. Jaǵdaı tolyǵymen belgili boldy. Olar endi Iran Islam Respýblıkasynyń jaýlarymen sóz baılasyp áreket etip jatyr, - dedi ol. 

Osy aptada BUU Bas hatshysy Antonıý Gýterrısh narazylyq aktsııalaryna baılanysty odan ári shyǵyndardyń aldyn alý qajettiligin atap ótip, Islam Respýblıkasynyń bıligin sóz bostandyǵy, qaýymdastyqtar jáne beıbit jınalý quqyqtaryn qurmetteýge shaqyrdy. 

Buǵan deıin Irandaǵy narazylyq sherýi kezinde adamdar qaza tapqanyn habarlaǵan bolatynbyz. 

Sondaı-aq Iran bıligi elde bastalǵan jappaı úkimetke qarsy narazylyqtarǵa jaýap retinde ınternetke qoljetimdilikti shektegenin jazdyq.