Iran 1 mıllıonnan astam adamdy mobılızatsııalady

ASTANA.KAZINFORM -Tegeran eskalatsııa qaýpi tóngen jaǵdaıda uzaqqa sozylǵan qaqtyǵysqa daıyn ekenin kórsetti.

Tasnim aqparat agenttiginiń jaǵdaıdan habardar áskerı derekkózge silteme jasaı otyryp habarlaýynsha, Iran AQSh-pen jerdegi qaqtyǵysqa bir mıllıonnan astam jaýyngerdi jumyldyrdy.

Eldiń ońtústigindegi AQSh operatsııalarynyń qyzý talqylanýyna baılanysty Iranda ásker jumyldyrý belsendiligi kúsheıip, armııa, Islam revolıýtsııasynyń saqshylar korpýsy jáne «Basıdj» qurylymdary qataryna eriktilerdiń aıtarlyqtaı aǵyny tirkelgeni habarlandy.

Tek belsendi áskerı qyzmetkerler ǵana emes, qaýipsizdik kúshterine qosylýǵa ótinish bergen jastar da shaıqasqa qatysýǵa daıyn ekendikterin bildirdi.

— AQSh Ormýz buǵazyn ashqysy keledi, bul qalypty jaǵdaı. Biz olardyń strategııasyn júzege asyrýǵa da, buǵazdy jabyq ustaýǵa da daıynbyz» - dep habarlaǵan agenttik derekkóz sózin keltiredi.

Basylym jumyldyrý qaqtyǵystyń ýshyǵýy men Iranǵa syrtqy qysym jasaý áreketterine jaýap retinde qarastyrylyp jatqanyn atap kórsetedi.

Iran bıligi tarapynan bul habarlamalar resmı túrde rastalǵan joq.

Biz buǵan deıin Axios basylymynyń málimeti boıynsha, AQSh Iranǵa qarsy «sońǵy soqqy» nusqalaryn qarastyryp jatqanyn habarlaǵan edik. Sonymen qatar, Iran AQSh operatsııasynyń yqtımaldyǵyna qatysty alańdaýshylyq aıasynda Harg aralynyń qorǵanysyn kúsheıtip jatyr.