Iraktyń jańa prezıdenti saılandy
ASTANA. QazAqparat - Iraktyń ókilder keńesi (Parlament) el prezıdenti etip Fýad Maasýmdy saılady, dep habarlady Rosbalt respýblıkanyń BAQ-taryna silteme jasap.
Saılaý sársenbi kúni ótýi tıis edi, alaıda joǵarǵy memlekettik laýazymǵa úmitkerler jónindegi depýtattardyń alaýyzdyǵynan keıinge qaldyrylǵan bolatyn.
Endi Ókilder keńesiniń basty mindeti úkimetti qalyptastyrý bolmaq. Eń aldymen parlamentshiler basshylyq laýazymdar - spıker, prezıdent jáne premer-mınıstr qyzmetteri jóninde kelisip alýy tıis. Ótken aptada spıker bolyp súnnıt koalıtsııasynyń ókili Selım ál-Djýbýrı saılanǵan bolatyn.
Irakta prezıdent negizinen ókilettik qyzmetter atqarady da, naqty bılik premer-mınıstrdiń qolynda bolady. Ol aldaǵy kúnderde saılanbaq.
Iraktyń qazirgi prezıdenti Talabanı 2012 jylǵy jeltoqsanda Germanııa klınıkalarynyń birine jatqyzylǵan bolatyn, ótken senbi kúni ǵana birjarym jyldan keıin elge oraldy. Talabanı 2005 jyly prezıdent bolyp saılanǵan edi, 2010 jyly qaıta saılandy.
Irak prezıdentin saılaý elge bóliný qaýpi tónip turǵan kúshti daǵdarys kezine tuspa-tus kelip otyr. Baǵdad qazirdiń ózinde negizinen súnnıtter turatyn biraz provıntsııasyna baqylaýdan aıyrylyp otyr, olarǵa búginde «Islam memleketi» lańkestik uıymy bılik etýde. Sonymen birge, Irak Kúrdistanynyń bıligi de ózin-ózi bıleý jóninde referendým ótkizýge nıettenýde.
