Iraktyń soltústiginde túrikmen tili resmı til bolyp qabyldandy
ASTANA. QazAqparat - Irak Kúrd aımaqtyq ákimshiligi parlamenti túrikmen tiliniń resmı til retinde qoldanylýyn qabyldady, dep jazady 24.kz.
Irak túrikmen maıdanynyń depýtaty Aıdyn Marýf atalǵan zańnyń mańyzdylyǵyna nazar aýdaryp: «Osy zańǵa qaraǵanda Kúrdistan aımaǵynda arab jáne kúrd tilderimen qosa, endi túrikmen tili de resmı til retinde mektepterde, memlekettik organdarda jáne sottarda qoldanylady. Bul úshin túrikmen turǵyn sany 20 paıyz bolýy kerek. Qazir Erbıl jáne Súleımanıeniń Kıfrı aýdany osy shartqa saı. Osyndaǵy túrikmender úshin mańyzdy kezeń bastaldy», - dedi.
Marýf 1993 jyldan beri túrik tiliniń mektepterde bilim tili retinde qoldanylǵanyn eske salyp, túrikmenderdiń osy taqyrypta jetkilikti ınfraqurylymy bar ekenin aıtty.
Aıta keteıik, Irakta keminde eki mıllıon túrikmen ómir súredi.
