Iraktyń soǵys aımaǵynan shyǵarylǵan otandastarymyz elge jetti
ASTANA. QazAqparat - Iraktyń soǵys júrip jatqan aımaǵynan reseılik taraptyń kómegimen shyǵarylǵan Qazaqstannyń 4 azamaty Otanyna oraldy. Bul týraly QR Syrtqy ister mınıstrliginiń baspasóz hatshysy Ánýar Jaınaqov Feısbýktegi paraqshasynda jazdy, dep habarlaıdy QazAqparat.
«Iraktyń soǵys júrip jatqan aımaǵynan reseılik taraptyń kómegimen shyǵarylǵan Qazaqstannyń 4 azamaty otanyna oraldy. Olardyń arasynda 1985 jyly dúnıege kelgen áıel men onyń kámeletke tolmaǵan úsh balasy bar. Qazaqstan azamaty sanalatyn taǵy 3 bala men olardyń Reseı azamatshasy sanalatyn anasy Groznyı qalasyna jetkizildi. Olar qazirgi ýaqytta da sol jerde. Eki otbasy da Aqtaý qalasynyń turǵyndary», - dep jazdy ol.
Mınıstrlik ókiliniń sózine qaraǵanda, qalǵan qazaqstandyqtar áli de Irakta. Qazirgi ýaqytta Qazaqstannyń Iordanııadaǵy konsýly olardy otandaryna qaıtarý máselesimen aınalysýda.
«Qosymsha aqparat sál keıinirek beriletin bolady», - dedi Jaınaqov.
