Iraktyń energııa júıesi isten shyǵyp, kóp jerlerde jaryq sóndi

ASTANA. KAZINFORM – Iraktyń barlyq provıntsııalarynda ulttyq energııa júıesiniń isten shyǵýyna baılanysty jaryq jappaı sóndirildi, dep habarlaıdy Anadoly.

Iraktyń Elektr energetıkasy mınıstrliginiń málimetinshe, energııa júıesiniń kúıreýine ákelgen apattyń sebepterin anyqtaý úshin tergeý bastaldy.

Vedomstvo sondaı-aq júıeniń tolyq isten shyǵýynan keıin toqtap qalǵan elektr stantsııalary men elektr jetkizý jelilerin qaıta iske qosý jumystary bastalǵanyn málimdedi.

Qazirgi ýaqytta eldiń kóptegen aýdandarynda memlekettik elektr energııasynyń ornyna aqyly túrde halyqty elektrmen qamtamasyz etetin jeke kvartaldyq generatorlar paıdalanylyp jatyr.

Ótken jyldyń tamyz aıynda Iraktyń búkil energııa júıesi aptap ystyq pen elektr energııasyn tutynýdyń kúrt ósýine baılanysty isten shyqqan bolatyn.

Osyǵan deıin Irakta AQSh-tyń Vıktorııa áýe bazasyna drondar shabýyl jasaǵany týraly jazdyq.