Iraktan oralǵan tul jetim sábıdiń ájesi tabyldy
NUR-SULTAN. QazAqparat – Iraktan oralǵan tul jetim sábıdiń ájesi tabyldy. QR Bilim jáne ǵylym mınıstriniń balalar quqyǵy jónindegi keńesshisi Raısa Sher aıtty, dep habarlaıdy QazAqparat tilshisi.
Aıta keterligi, Raısa Sher Nur-Sultan qalasynyń qıyn jaǵdaıǵa tap bolǵan balalardy qoldaý ortalyǵynda Iraktan jetkizilgen balalardyń jaı-kúıin BAQ ókilderine tanystyrǵan bolatyn.
Tanystyrý barysynda tilshilerdiń saýalyna oraı ol tul jetim sanalǵan bir balanyń týysy tabylǵandyǵyn atap ótti.
Al QR Syrtqy ister mınıstrliginiń ekinshi hatshysy Danııar Baıbekov ol balanyń ájesi ekendigin naqtylady.
«Onyń ájesi bar jáne Qazaqstanda júrgizilgen genomdyq saraptama týystyǵyn dáleldedi. Áıel atalǵan balanyń bıologııalyq ájesi sanalady», - dedi D.Baıbekov.
Iraktan jetkizilgen 14 bala áleýmettendirilip, ońaltýdan ótip jatqan mekeme qazirgi ýaqytta karantınge jabylǵan. Sebebi balalardyń birinnen juqpaly aýrý tabylǵan.
«Balalar osy jerge jetkizilgennen keıin 15 medıtsına mamany olardy juqpaly aýrýlarǵa tekserý júrgizdi. Qazirgi ýaqytta karantın jarııalanǵan. Sebebi bir bala skarlatınamen aýyrǵan jáne ol qazirgi ýaqytta medıtsına mekemesinde jatyr», - dedi Raısa Sher.
