Iraktan oralǵan balalardy tezirek týystaryna tapsyrýǵa tyrysamyz – BǴM
«14 balanyń 10-y - mektepke áli barmaǵan balalar. Tórteýi – oqýshy. Syrtqy ister mınıstrligi BǴM men basqa da memlekettik organdardyń kómegimen jasóspirimderdi qaıtarý jóninde arnaıy is-áreket josparyn bekitken bolatyn. Qazirgi tańda balalardyń bári Nur-Sultan qalasynyń ómirlik qıyn jaǵdaıda qalǵan balalardy qoldaý ortalyǵynda. Ortalyqta balalar úshin barlyq jaǵdaı jasalǵan. Medıtsınalyq personal tolyq. As máziri, kún tártibi túgel bekitilgen. Balalarmen ártúrli saladaǵy mamandar jumys júrgizedi. Olardyń ishinde psıhologtar, tárbıeshiler, muǵalimder men áleýmettik qyzmetkerler bar», - deıdi Bilim jáne ǵylym mınıstriniń keńesshisi.
Raısa Sherdiń aıtýynsha, kúni keshe Iraktan qaıtarylǵan balalardy 15 dáriger tekserip, tıisti protsedýralardy ótkizgen.
«Balalar ortalyqta júgirip oınap, ózderin jaıly sezine bastady. Analarymen birge Irakta turǵan balalar esh jerde oqymaǵan. Eshqandaı balabaqsha nemese mektepke barmaǵan. Sondyqtan, eki kúnniń ishinde mamandar balalardyń psıhologııalyq jaǵdaıyn tekserip, bilimi men daǵdylaryn baqylaıdy. Birneshe kúnnen keıin ár balamen jeke jumys isteıtin jeke jospar ázirlenedi. Barlyq tıisti protsedýra júrgizilgennen keıin balalardyń bári týystaryna tapsyrylady. Týystary kúni keshe olardy áýejaıdan kútip alǵan bolatyn», - dedi ol.
Raısa Sher Iraktan kelgen balalardyń ahýaly týraly aıtty.
«Sırııadan oralǵan balalar analarymen birge keldi. Al Iraktan kelgender ata-anasyz qaıtty. Sondyqtan, olar ata-ana qamqorlyǵynsyz qalǵan balalar sanatyna jatady. Sol sebepti, biz tezirek barlyq uıymdastyrý protsedýrasyn júrgizip, balalardy týǵan-týystaryna tapsyrýǵa tyrysamyz», - dedi ol.
Mınıstrdiń keńesshisi balalardyń bári qoǵamǵa beıimdelgennen keıin mektepke, balabaqshalarǵa baryp, jergilikti aýrýhanalarǵa tirkeletinin aıtyp ótti.
Al Syrtqy ister mınıstri Erjan Ashyqbaevtyń aıtýynsha, Iraktan qaıtqan balalar tildi jetik biledi dep aıtý qıyn. Qazir olarǵa ortalyqta arnaıy dıagnostıka júrgiziledi. Jalpy, balalar qazaqsha da, oryssha da túsinedi. Balalardyń analary ómir boıyna bas bostandyǵynan aıyrylǵan.
«Bizdiń resmı derekterge sáıkes, Irakta Qazaqstan balalary joq. Jalpy, operatsııaǵa 57 mln teńge jumsaldy. Bul qarjynyń negizgi bóligi balalardy qaıtarýǵa arnalǵan ushaqty jaldaý úshin jumsalǵan. Al endi saýyqtyrý máselesi de, basqa protsedýralar da ortalyq jáne jergilikti memlekettik organdardyń bıýdjetimen qarjylandyrylady», - dedi Erjan Ashyqbaev.
Eske sala ketsek, QR Prezıdenti Qasym-Jomart Toqaevtyń tapsyrmasy boıynsha júzege asyrylǵan gýmanıtarlyq aktsııa nátıjesinde Irak túrmesinde óz analarynyń janynda jatqan 14 qazaqstandyq bala qaıtarylǵan bolatyn.
